БИШКЕК, 10-апр. — Sputnik. 25-март күнү Балыкчы — Каракол автокаттамында маршрутка менен келген жүргүнчүлөргө облустук бийлик кайрылып, COVID-19га анализ тапшырууну суранып жатат. Бул туурасында өкмөттүн Ысык-Көл облусу боюнча өкүлчүлүгүнүн маалымат кызматы кабарлады.
Кайрылуу Каракол шаары менен Ак-Суу районунун тургундарына багышталган.
"25-март күнү саат 00:30дар чамасында Балыкчы шаары менен Сары-Камыш айылынын чегинен Каракол шаарына сапар тартып, саат 04:30дар чамасында Караколго келген кара түстөгү 09KG 411AAB номерлүү Mercedes-Benz маршруткасынын жүргүнчүлөрүнө кайрылабыз. Жеке өзүңүздүн, жакындарыңыздын жана элдин коопсуздугу үчүн тез аранын ичинде жакынкы поликлиникага барып COVID-19га анализ тапшырыңыздар", — деп айтылат маалыматта.
Облустук бийлик кайрылгандардын аты-жөнү купуя сыр катары сакталарына кепилдик берерин айткан.
Кыргызстанда коронавирус жуктуруп алгандардын жалпы саны 298ге жетти. Анын бешөө көз жумуп, 39у айыгып чыкты. Бейтаптардын арасында 39 медицина кызматкери коронавирус менен алпурушууда.
Ал эми Ысык-Көл облусунда COVID-19 төрт адамдан табылган.
Учурда өлкөдө абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Кабарларды ыкчам, ыңгайлуу шартта окуу үчүн Telegram-каналыбызга баш багыңыз.