БИШКЕК, 23-янв. — Sputnik. Россиянын Челябинск облусунда КамАЗ менен жеңил унаа кагышкан жол кырсыкта көз жумган беш кишинин үчөө кыргызстандык экендиги аныкталды. Бул тууралуу КРдин Россиядагы элчилигинин маалымат катчысы Гүлбарчын Байымбетова кабарлады.
Эске сала кетсек, кечээ, 22-январь күнү, Бишкек убактысы менен саат 20.50дө Челябинск — Троицк жолунун 107-чакырымында Троицкти көздөй бара жаткан Honda үлгүсүндөгү жеңил унаанын айдоочусу бурганактын айынан каршы тилкеге чыгып кетип, КамАЗ менен кагышкан. Кырсыктан көз жумган жеңил унаадагы беш киши кыргызстандыктар болушу мүмкүндүгү айтылган. Анткени автоунаа KG номерлүү болгон.
Элчиликтин айтымында, үч кыргызстандыктын сөөгү Челябинск облусундагы өлүкканада. Каза тапкан дагы эки киши боюнча тактоо иштери жүрүп жатат. Көз жумгандардын биринин тууганы окуя болгон жерге келди, калган маркумдардын жакындары изделүүдө.
Окуя элчиликтин көзөмөлүнө алынганы кошумчаланды.