Алар колдоруна "Текебаевге боштондук", "Жапаровго боштондук" жана "Чотоновго боштондук" деп жазылган плакаттарды көтөрүп алышкан.
Чогулгандар камактагыларды чыгарууну талап кылышты.
Сот түшкө чейин Садыр Жапаровдун ишин карап, аны 30-апрелге жылдырды. Жыйын учурунда жактоочулар сот коллегиясындагы судьяга ишеним көрсөтпөөнү сунуш кылып, ал канааттандырылган.
Эске салсак, Жогорку Кеңештин экс-депутаты Өмүрбек Текебаев Кылмыш жаза кодексинин "Коррупция" жана "Алдамчылык" беренелери боюнча айыпталып, 8 жылга эркинен ажыратылган. Соңку өкүмдү Жогорку сот чыгарган. Бирок кийин Текебаевдин жактоочулары жаңы ачылган жагдайлар боюнча Жогорку сотко кайрылып, ишти кайра кароону өтүнгөн.
Ал эми Садыр Жапаров 2013-жылы октябрда болгон митинг учурунда Эмилбек Каптагаевди барымтага алууну уюштурууга тиешеси бар деп айыпталып, 11 жыл 6 айга кесилген. Анын иши да жаңы жагдайлар боюнча кайрадан каралууда.