БИШКЕК, 25-дек. — Sputnik. Кыргызстанда атмосферага зыяндуу заттарды нормадан жогору бөлүп чыгарган унааларды аныктоо үчүн рейд жүрүп жатат. Бул тууралуу ИИМдин Жол кыймылы коопсуздугун камсыздоо башкы башкармалыгынан кабарлашты.
"Бүгүнкү күндө абаны эң көп булгаган автоунаалар болуп эсептелет. Мындан улам ЖКККББ Экология жана техникалык коопсуздук инспекциясы менен биргеликте унааларга рейд жүргүзүп жатат", — деп айтылат маалыматта.
Рейд учурунда укук коргоочулар менен экологдор атайын прибор менен унааларды текшерет. Эгер авто зыяндуу заттарды нормадан көп чыгарары аныкталса, айдоочу Административдик кодекстин 173-беренеси боюнча 1000 сом айыпка жыгылат.