Кечээ атагы ааламга тараган залкар жазуучу Чыңгыз Айтматовдун 90 жылдыгы белгиленди. Убакыт зымырап өтө берет экен, улуу инсанды арабыздан жоготконубузга 10 жыл болуп кетиптир. Чыңгыз атабыз 80 жылдыгын белгилөө алдында турганда дүйнө салган болчу. Ал убакта мен айылда мектеп окуучусу элем. Анын чыгармаларынан үзүндү коюп, Майсалбектин ролун аткарганым эсимде.
Ал эми бул сүрөттөн ай талааны жаңырта ыйлаган Жамал Сейдакматованы көрө аласыз. Бул кадр "Акбаранын көз жашы" тасмасын тартуу учурунда алынган.
Бул сүрөт түрмөгүнөн Айтматовдун эл көрө элек сүрөттөрүн таба аласыз.
Улуу калемгердин туулган күнүнө жана 90 жылдык мааракесине арналып улуттук филармонияда президенттин, өкмөт башчысынын, министрлердин, депутаттардын жана шаар тургундарынын катышуусунда майрамдык иш-чара өттү.
Анда мамлекет башчы Сооронбай Жээнбеков сөз сүйлөп, кыргыз жана Чыңгыз деген сөздөр ар бир адамдын жүрөгүндөгү ыйык түшүнүк экенин, кыргыз, Чыңгыз жана Манас деген түшүнүктү бөлүп кароого болбой турганын айтты.
Мындан сырткары, өлкөнүн биринчи адамдары "Ата-Бейит" мемориалдык комплексине барып Айтматовдун бейитине гүл коюшту.
Айтматов жазган чыгармалары менен дүйнө элиң таң калтырса, азыркы аткаминерлерибиз акчалары менен төбө чачты тик тургузууда.
"Оптима банк" Дүйшөнбек Зилалиевдин банктык эсебинен чыгарылган акча боюнча тараган видеого байланыштуу билдирүү таратты. Маалыматта банктын видеону 889 миң 900 доллар акчаны ээсинен башка адамга бербегени айтылат. Таң калбаңыз, Зилалиев банктагы акчасын алып кетпей коюп, анан артынан жеткирип беришиптир. Кандай адамдар банктагы акчасын кароосуз таштап салат? Же унутуп калды бекен?..
Премьер-министр Мухаммедкалый Абылгазиев транспорт жана жолдор министри Жамшитбек Калилов орун басарынын коррупциялык ишине тиешеси жоктугун айтууда дейт. Бирок ал иш өкмөткө моралдык сокку болгонун белгиледи. Бул боюнча депутат Абдывахап Нурбаев өкмөттү кескин сынга алды.
Өмүрбек Бабановдун иши боюнча маалымат алуу үчүн УКМК менен Башкы прокуратуранын жетекчилери парламентке чакырылыган болчу. Бирок күн тартибиндеги маселелерден улам убакыт жетпей, каралбай калды.
Баса, парламент өлкөнүн казынасын Бактыгүл Жээнбаеванын колуна тапшырды.
Министрди шайлоо учурунда депутат Исхак Масалиев Жээнбаеванын мүнөзү чорт экенин айтып, балким Каржы министрлигине ажыдаардын функциясын аткаруучу киши керек болуп жаткандыр деди.
Валюта наркы. Сомдун баасы долларга карата орто эсеп менен 69.77 (сатып алуу) жана 69.90 (сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгү бензин 47.00 сом, АИ-92 үлгүсүндөгү май 44.00 сом, ал эми дизель майы 46.50 сомдон сатылууда.
Соңку сөз ордуна. Азыраак жеп, көбүрөөк иштейли!
Амандыгыңызды тилеп Эламан Карымшаков.