БИШКЕК, 21-сен. — Sputnik. Биринчи вице-премьер-министр Кубатбек Боронов Бишкек жылуулук электр борборунун жаңы химиялык суу тазалоо цехинин курулушунун жүрүшү менен таанышуу үчүн барды. Бул туурасында өкмөттүн маалымат кызматынан кабарлашты.
Анда ишкананын директору Андрей Воропаев станцияга отундун ташылышы, жылытуу мезгилине карата жүргүзүлүп жаткан иштер тууралуу маалымат берген.
"Учурда турбиналык жана буу казандар цехин жылуулоо жана айнек салуу иштери аткарылууда, көзөмөлдөөчү-ченөөчү жабдуулардын алынып келиниши күтүлүүдө, негизги жана көмөкчү жабдуулардын ремонту графикке ылайык жүрүүдө" — деп айткан директор.
Ошондой эле Боронов кыдыруу учурунда көмүр кампасынын курулушу, турбиналык жана буу казандар цехинин иши менен таанышканы айтылат.
Мындан сырткары, ал жаңы химиялык суу тазалоо цехинин курулушу жыйынтыкталган соң комиссиялык кабыл алуу жүргүзүлүшү керектигин белгилеген.