БИШКЕК, 28-июн. — Sputnik. Сокулукта өгөй атасы тарабынан мыкаачылык менен сабалган 10 жаштагы эгиз кыздардын бири майып экенин Акыйкатчы институтунун маалымат кызматы аталган аймактын үй-бүлөнү жана баланы коргоо бөлүмүнө таянуу менен билдирди.
Эскерте кетсек, 27-июнь күнү катуу таякталган эгиз кыздар жаракатынан улам ооруканага түшкөнү, ал эми энеси күйөөсүнүн үстүнөн арыз жазуудан баш тартып жатканы жарыяланган.
Акыйкатчынын Чүй облусу боюнча өкүлү жабыркаган секелектер дарыланып жаткан аймактык ооруканага барып, алардан кабар алган. Дарыгердин айтымында, кыздардын абалы туруктуу, бирок невропатологдун текшерүүсүнөн өтүшө элек.
"Сүйлөшүү учурунда кыздар өгөй атасы сабаганын танып, бактан, үйдүн чатырынан кулап кеткенин айтып жатышты. Андан соң алардын 43 жаштагы энеси менен да сүйлөшүү жүргөн. Ал болушунча 33 жаштагы жарандык күйөөсүнүн күнөөсү жок экенин далилдөөгө аракет кылды", — деп айтылат маалыматта.
"Ал каргашалуу күнү кыздардын бири үйдөн чыгып кеткен түгөйүн издеп кетет. Энеси ашканада тамак жасап жаткан. Кыздарды кайтып келгенден кийин өгөй атасы электр зымы менен сабаган. Талма оорусу менен жабыркаган кыздын мурду канап кетет. Ата сөрөй аялы эшикти каккылаганда гана таягын токтотот", — деп айтылат маалыматта.
Бүгүн тергөөчү кыздарды үй-бүлөнү жана баланы коргоо бөлүмүнүн өкүлү менен энесинин көзүнчө суракка алган.
"Кыздар психологиялык жардамга жана колдоого муктаж. Аларга күйөөсүнө болушкан энеси басым жасап жатышы мүмкүн. Себеби кыздардын бири катуу коркуп калганы көрүнүп турат. Ал энесинин колун кармап, эки сөзүнүн биринде "мен апамды жакшы көрөм" деп кайталоодо", — делет билдирүүдө.
Кыздарды коргоо максатында палатасынын жанында социалдык кызматкер нөөмөттө турат. Ушу тапта Акыйкатчынын Чүйдөгү өкүлү бул ишти жеке көзөмөлүнө алды.