Маалым болгондой Тарых музейин "СМУ-3" ишканасы реконструкциялаган. Sputnik Кыргызстан агенттиги аталган курулуш ишканасынын тарых-таржымалын жана буга чейинки жасаган жумуштарын билип көрдү.
Ат майдан. Чолпон-Атадагы ат майданды салуу шыбагасы "СМУ-3" ишканасына буюрган. 2014-жылы өткөн биринчи Дүйнөлүк көчмөндөр оюнуна аз калганда салынган ипподромдун курулушуна алгач 487 миллион сом керектелсе, кийин айрым жерлери оңдолуп жатып жалпы 1,1 миллиард сом сарпталган.
8 миллиондук флагшток. Орто-Сай айылындагы Боз-Бөлтөк тоосуна Кыргызстандагы эң бийик тууну орнотуу милдетин да ушул компания өз мойнуна алган. Желекти орнотуу мамлекеттик бюджеттен каржыланбастан, демөөрчүлөрдөн түшкөн 7-8 миллион сомго жасалганын жергиликтүү ЖМКлар ошол учурда жазып чыккан. Желек Түркиядан атайын буюртма менен жасалып келген.
Манастын эстелиги. 2011-жылы өлкө эгемендигинин 20 жылдыгында "Ала-Тоо" борбордук аянтына "Эркиндик" эстелигинин ордуна СМУ-3 Манастын айкелин орноткон.
Чала бүткөн мектеп. "Ала-Тоо" конушунда 2015-жылы жаңы салынган №82 мектеп үч жылга жетпей, пайдубалы 10-20 сантиметрге чөгүп кеткен. Билим берүү жайынын пайдубалы жана 1-блогу салынып бүтүп токтоп калганда Мамлекеттик архитектура, курулуш жана турак жай коммуналдык чарба агенттиги ишти "СМУ-3" ишканасына өткөрүп берген. Мектепти салууга жалпы жонунан 243,4 миллион сом керектелген. Анын 162,8 миллион сомун Казакстандын президенти бөлүп берсе, 80,5 миллион сомун мэриянын коомдук-мамлекеттик капиталдык курулуш башкармалыгы төлөгөн. Мекеменин үч жылга жетпей чөгө башташын компаниянын жетекчисинин сапат жана коопсуздук боюнча орун басары Шайман Сартбаев туура эмес эксплуатация менен байланыштырган. Бирок ишкана мектепти өз каражатынан кайра жасап берүүнү мойнуна алган. Баса, мектепти оңдоо иштери жыйынтыкталганын мэриядан бүгүн кабарлашты.
Бирге иштешкен чет өлкөлүк компаниялар. СМУ-3 Германия, Франция, Казакстан, Россия, Кытай, Түркия, АКШ өлкөлөрүнүн курулуш компаниялары менен иштешет. Ошондой эле алар өзүнүн расмий сайтына долбоорлоо боюнча Франциянын Gregory International SA, DLR Group жана Германиянын Vitrinen- und Glasbau REIER GmbH компаниялары менен иш алып барарын баса белгилешкен.
Жаңы курулуштар. СМУ-3 ишканасы турак үй куруу боюнча ишмердүүлүгүн улантып келет. Алар учурда Ибраимов жана Каралаев көчөлөрүнө көп кабаттуу турак үйлөрдү салууда. 40 жыл ичинде ишкана жалпы аянты 209 миң 998 чарчы метрге жеткен имараттарды куруп, 3610 орунга ылайыкташкан мектептерди салган.