БИШКЕК, 30-янв. — Sputnik. Премьер-министр Сапар Исаков “Электр станциялары” ачык акционердик коомунун бир катар жетекчилерин ээлеген кызматынан алууну тапшырганын өкмөттүн маалымат кызматы билдирди.
Дүйшөмбү күнү Исаков ТЭЦтеги түзүлгөн кырдаал үчүн элден кечирим сурап, энергетика тармагы жана күз-кыш айларына даярдык үчүн жоопкер адамдар жазалана турганын айткан.
“Премьер-министр Улуттук энергохолдингге ”Электр станциялары” ишканасынын башкы директорунун орун басары Бердибек Боркоев менен ТЭЦ директору Нурлан Өмүркул уулун жумуштан алууну сунуштоо чечимин кабыл алды”, — деп айтылат маалыматта.
Исаков шалаакылыкка жол берген кызматкерлерди жазалоо аталган комиссиянын ишинин жыйынтыгы менен чечилерин белгиледи.
Эскерте кетсек, 26-январь күнү кечинде ТЭЦте авария болуп, кубаттуулугу эки эсе төмөндөп кеткен. Бир күндөн кийин өкмөт көйгөй чечилгенин айтканы менен жылуулук берүү калыбына келген эмес. 29-январь күнү дагы бир түтүктөн жаракат кеткени белгилүү болгон.
30-январь күнү таңкы саат 4:40да Бишкек ТЭЦиндеги №3 блок ишке киргенин "Улуттук энергохолдинг компаниясы" ААКнын маалымат кызматы кабарлаган. Ага ылайык жаңы блок 150 МВт энергияны иштеп чыгып, +88 градуска чейин жылуулук берери айтылган. 29-январда системага суу толтуруу аракеттери башталган болчу.