БИШКЕК, 11-янв. — Sputnik. Каракол шаарындагы ижарага лыжа берген жайлардын биринде кардар лыжанын таягын сындырып алганы үчүн айып пул төлөөдөн баш тарткандыктан массалык мушташ чыккан. Бул тууралуу Sputnik Кыргызстан агенттигине Ысык-Көл облустук ички иштер башкармалыгынан кабарлашты.
Окуя көзөмөл камерасына тартылып калган.
Анда көрүнүп тургандай белгисиз адамдар имаратка кирип келип, бир нерсени талап кылат. Көп өтпөй кожоюндар менен "коноктор" мушташа кетишет.
ОИИББден билдиришкендей, мушташ лыжаларды ижарага берген жайдын кызматкерлери менен жергиликтүү тургундар арасында болгон.
"Жергиликтүү тургундардын бири лыжаны ижарага алып таякчасын сындырып алган. Ага эки миң сом айып төлөшү керектиги айтылганда ортодо түшүнбөстүк жаралып, мушташка айланган. Тургундар бир аз ичип да алышкан экен. Акырында эки тарап элдешип, милицияга арыз түшкөн жок", — дешти милициядан.
Ал эми лыжаны ижарага берген жайдын кызматкерлеринин бири Sputnik Кыргызстан агенттигинин кабарчысына мушташ ортодогу түшүнбөстүктөн чыкканын ырастады.
"Ал адамдар биздин тааныштар болгондуктан көйгөйдү өз ара эле чечип алдык", — деди кызматкер.
Аталган борбордон акча талап кылышкан деген маалымат чындыкка коошпой турганын кошумчалады.