БИШКЕК, 26-авг. — Sputnik. Эпидемиологиялык кырдаалга байланыштуу киргизилген карантинге карабай Кыргызстанда жол кырсыктары боюнча статистика көңүл жылытарлык эмес. Бул тууралуу Жол кыймылы коопсуздугун камсыздоо башкы башкармалыгы (ЖКККББ) билдирди.
Ведомство жол кырсыктарынын санын кыскартууга негиз боло турган себептерди атады.
- Кесипкөйлүк жана айдоочулук курамдын дисциплинасы;
- Транспорт каражаттарынын техникалык абалы;
- Жолдордун инфраструктурасынын талаптарга дал келиши;
- Жол кыймылынын катышуучуларынын дисциплинасы (жөө жүргөндөр, велосипедчендер жана башкалар);
- Министрликтердин, ведомстволордун жана мекемелердин жетекчилери менен кызматкерлеринин жоопкерчиликтүү болушу.
Ал эми авариялардын басымдуу бөлүгү жол эрежелеринин одоно бузулушунан келип чыгары белгиленет.
Алар төмөнкүлөр:
- Ылдамдык режиминин сакталбашы;
- Өтүү кезегинин сакталбашы;
- Каршы тилкеге чыгып айдоо;
- Туура эмес дистанция;
- Жөө адамдарды өткөрүү эрежесинин бузулушу;
- Баңгизат чегип же мас абалында рулга отуруу.
Жол эрежесин бузууга салынган айыптардын көлөмү кантип өзгөрдү? Инфографика
“Жол кырсыгынын күнөөкөрлөрү бир гана айдоочулар эмес, айрым учурларда жөө жүрүүчүлөр дагы болуп калат. Ошондой эле жол кырсыктарынын көп катталышына жол инфраструктурасынын абалы да таасир этет. Жол кыймылынын катышуучуларынын бири-бирине сылык мамилеси жана сабырдуулугу коопсуздуктун негизи куралы бойдон кала берет”, — деп билдирди ЖКККББ.
Башкармалык жол-эксплуатациялоо жана муниципалдык кызматтарга өзүнө жүктөлгөн милдеттерин талаптагыдай аткарышы керектигин эскертти.
