БИШКЕК, 23-авг. — Sputnik. Кыргызгидромет агенттиги алдыдагы аптага карата аба ырайынын божомолу туурасында маалымат берди.
Ага ылайык, Бишкек шаарында дүйшөмбү жана шейшембиде күн ачык болот. Ал эми шаршемби күнү эртең менен, бейшембиде мезгил-мезгили менен жаан жаап, күн күркүрөшү күтүлөт. Батыштан соккон шамалдын ылдамдыгы секундасына 4-9 метрден 14 метрге жетиши мүмкүн.
Чүй жана Талас облустары
24-25-августта түнкүсүн Чүй облусунун тоолуу райондорунда өткүн өтөт. Бирок дыйканчылык аймактарында жана Талас облусунда жаан-чачын болбойт.
26-27-августта көпчүлүк аймактарда мезгил-мезгили менен жаан, бийик тоолуу жерлерге кар жаайт. Кээ бир райондордо жамгыр нөшөрлөп жаай турганы айтылды.
Батыштан соккон шамалдын ылдамдыгы секундасына 4-9 метрден кээ бир райондордо 15-20 метрге жетиши ыктымал.
Ош, Жалал-Абад, Баткен облустары
Дүйшөмбү жана шейшембиде түнкүсүн жаан-чачын күтүлбөйт. Шейшембиде күндүзү Ош, Жалал-Абад облустарынын тоолуу аймактарында өткүн өтсө, дыйканчылык аймактарында жана Баткен облусунда күн ачык болот. Шаршемби жана бейшемби күндөрү Жалал-Абад облусунун көпчүлүк аймактарында, Ош менен Баткендин кээ бир райондорунда мезгил-мезгили менен жамгыр, тоолорго кар жаайт. Синоптиктер бейшембиде Жалал-Абаддын кээ бир айылдарында жамгыр нөшөргө айланарын эскертет. Батыштан соккон шамалдын ылдамдыгы секундасына 4-9 метрден кээ бир райондордо 15-20 метрге жетиши күтүлөт.
Суук түшпөйбү? Күздүн биринчи айы сентябрга карата аба ырайы
Ысык-Көл облусу
Дүйшөмбүдөн шаршембиге чейин кээ бир райондордо өткүн өтүп, бейшембиде жаан катуу жаай турганы айтылды. Бийик тоолорго кар жаайт. Батыштан соккон шамалдын ылдамдыгы секундасына 4-9 метрден, 24-августта күндүз жана 25-27-августта кээ бир райондордо 15-20 метрге жетет.
Каракол менен Чолпон-Ата шаарларында 24-25-августта абанын температурасы жылуу бойдон сакталып, жаан-чачын күтүлбөйт. Бирок 26-27-августта күндүн көзү бузулуп, мезгил-мезгили менен жамгыр жаайт.
Нарын облусу
24-25-августта асманды ала булут каптабай, күн чайыттай ачык бойдон турат.
26-27-августта көпчүлүк аймактарда жаан жаап, бийик тоолуу райондордо кар жаайт.
Апта аягы жума күнү Ысык-Көл облусунун көпчүлүк аймактарында, Чүй, Талас, Ош, Жалал-Абад, Баткен, Нарын облустарынын кээ бир райондорунда өткүн өтүп, тоолорго кар жаашы ыктымал.
Сууга түшөрдө баланын жанынан карыш жылбаңыз! ӨКМдин ата-энелерге эскертүүсү
Ал эми ишембиде абанын температурасы бир аз жогорулап, Ысык-Көл облусунун кээ бир райондорунда, Чүй, Ош, Жалал-Абад, Нарын облустарынын тоолуу аймактарында өткүн өтүп, бийик тоолорго кар жаайт. Чүй, Ош, Жалал-Абад, Нарын облустарынын дыйканчылык аймактарында жана Талас менен Баткенде күндүн көзү бузулбайт.
