БИШКЕК, 5-ноя. — Sputnik. Президент Сооронбай Жээнбеков жол коопсуздугун камсыздаган ички иштер органдарынын бөлүктөрүн реформалоо боюнча эксперттик топтун жумушунун жыйынтыгы менен таанышты. Бул тууралуу өлкө башчынын маалымат кызматы билдирди.
Ага ылайык, Жээнбеков саясий-укуктук иликтөөлөр борборунун директору, жол коопсуздугун камсыздаган ички иштер органдарынын бөлүктөрүн реформалоо боюнча эксперттик топтун жетекчиси Тамерлан Ибраимов менен жолугушту. Ага Коопсуздук кеңешинин катчысы Дамир Сагынбаев да катышты.
Натыйжада жол коопсуздугун камсыздаган ички иштер органдарынын бөлүктөрүн реформалоо боюнча стратегия, Бишкек шаарында Патрулдук милиция түзүү боюнча пилоттук долбоорду ишке ашыруу боюнча иш-чаралар планы жана жол коопсуздугун камсыздаган ички иштер органдарынын бөлүктөрүн реформалоонун I этабын ишке ашыруу үчүн зарыл болгон нерселердин тизмеси иштелип чыккан.
Ибраимовдун айтымында, Жол коопсуздугун камсыздоочу башкы башкармалыгынын бөлүктөрү жана патрулдук-нөөмөт бөлүмдөрү бириктирилип, патрулдук милициянын жаңы бөлүмү түзүлөт да, кызматтык милдети өзгөрөт. Патрулдук милиция жолдордогу коопсуздукка гана эмес, жалпысынан бекитилген участкалардагы коомдук коопсуздукка да жооп берет. Патрулдук милиционерлер аларга бекитилген аймакты толугу менен көзөмөлдөп, мыйзам бузууларды аныктап, алдын ала чараларды көрүп, дайыма кыймылда болот.
Бул реформа үч баскыч менен ишке ашырылат. Биринчи — кадрларды сынактын негизинде тандоо. Экинчи баскычта тандалган кызматкерлер жарандардын укуктары боюнча маселелерди, тактикалык жана ок атуу даярдыгы, жол эрежелерин окуу сыяктуу тиешелүү окуудан өтүшөт. Үчүнчү баскыч — кызмат өтөөнүн өзү, ал антикоррупциялык чаралардан жана кубаттоо ыкмаларынан турат.
Президент Сооронбай Жээнбеков иштелип чыккан стратегия менен иш-чаралар планын колдой турганын жана аларды ишке ашыра берсе болорун белгиледи.
Мамлекет башчысы кызматкерлерди сынактан өткөрүп тандоо таза, жарандык сектордун өкүлдөрүн тартуу менен өтүшү керектигин баса белгиледи.
Эске салсак, 2018-жылдын август айында өлкөнүн президентинин тапшырмасы менен жол кырсыктарынын деңгээлин азайтуу жана жол коопсуздугун камсыздаган ички иштер органдарынын бөлүмдөрүнүн жумушун күчөтүү боюнча конкреттүү сунуштарды жана иш-чараларды иштеп чыккан эксперттик жумушчу топ түзүлгөн.
