БИШКЕК, 15-cен. — Sputnik. Октябрь айындагы аба ырайынын орточо температурасы 9…13 градусту түзөт. Бул тууралуу Sputnik Кыргызстан агенттигине Кыргызгидрометтин метеорологиялык бөлүмүнөн билдиришти.
Чүй облусунда октябрь айынын биринчи декадасында ысык болот: түнкүсүн 4…9, күндүз 22…27 градус болушу күтүлөт. Андан кийин термометрдин көрсөткүчү төмөндөй баштайт: түнкүсүн 1…6, күндүз 17…22 градус жылуу болот.
Талас облусунда температуранын диапозону 7…9 градустун тегерегинде болот. Айдын экинчи жарымында түнкүсүн 0…5 градуска чейин төмөндөп, кээ бир түндөрдө —3…-5 градуска жеткен үшүк жүрүшү мүмкүн, күндүз 15…20° жылуу болушу айтылды.
Ысык-Көл облусунда абанын орточо температурасы климаттык нормага жакын болуп, 7…9 градус жылуу болот. Айдын ичинде абанын температурасы түнкүсүн 1…6 градус жылуу болуп, айдын экинчи жарымында түнкүсүн —2…-4 градуска чейин үшүк жүрүшү мүмкүн. Күндүз 11…16 градуска чейин жылыйт.
Нарын облусунда октябрь ичи 0…5 градус жылуулуктан —1…-6 градус суукка чейин төмөндөп, күндүз 7…12 градустан 13…18 градуска чейин өзгөрөт.
