БИШКЕК, 1-фев. — Sputnik. Орто эсеп менен ар бир төрт күн сайын бир өспүрүм өз өмүрүнө кол саларын ИИМдин маалымат кызматы билдирди.
Ички иштер министрлигинин 2016-жылга берген статистикалык маалыматына ылайык, былтыр 95 өспүрүм өз өмүрүн кыйган. Алардын 39у кыздар болсо, 56сы балдар.
Кыргыз улуттук медициналык академиясынын психиатрия жана наркология кафедрасынын башчысы Татьяна Галако балдар мындай кадамга ойлонбой барышарын айтып берди.
"Ата-энеси бала каалаган нерсени сатып бербей, же анын көңүлү менен болбой койсо ушундай кадамга барышы мүмкүн. Ал өлүм эмне экенин түшүнбөйт. Өмүрүнө кол салган кишинин өзүнүн эле шору экенин алар билишпейт. Мындай чечимге жини келгенде, катуу таарынганда барышат", — деди ал.
Учурда Кыргызстанда өспүрүмдөрдүн аң-сезимине терс таасир тийгизген "Тихий дом" деген оюн көп талкууланууда. Өлкөнүн тийиштүү органдары кырсыктан оолак болуу үчүн бардык аракеттерди көрүп жатат.
