Лавров АКШ, Европа жана эл аралык саясат боюнча негизги позицияларды атады
© Sputnik / Игорь Егоров
/ Жазылуу
БИШКЕК, 21-окт. — Sputnik. Россиянын тышкы иштер министри Сергей Лавров дипломатиялык кызматка жаңыдан кабыл алынган ЖОЖдордун бүтүрүүчүлөрү менен жолугушууда АКШ, Европа жана эл аралык саясат боюнча өлкөнүн негизги позицияларын айтып берди.
Анын кебинин өзөктүү тезистери:
АКШ менен мамиле жана тынчтык сунуштары
Россия АКШ президентинин атайын чабарманы Стив Уиткофф менен Дональд Трамптын күйөө баласы Жаред Кушнердин сунуштарын карап көрөт. Эгер алар экономикалык жактан пайдалуу болсо, Москва макул болот, бирок эч кандай саясий жеңилдик берилбейт;
АКШда жаңы келген президент мурункусунун чечимдерине баш ийбеген саясий салт бар. Бул көрүнүш кийин Россия менен сүйлөшүүлөрдө соодалашуу куралы катары колдонулат;
АКШ — жакшы дегенде атаандаш, ал эми чындап келгенде адилеттүү күрөшкө даяр эмес каршылаш. Андыктан кандайдыр бир керемет күтүүнүн кажети жок.
Санкциялар жана дизелдик отун
Трамптын санкциялар боюнча мыйзамды колдонбой коюу чечимине суктануунун кажети жок, анткени бул мыйзамдын мөөнөтү жок, башка президент келсе кандай болору белгисиз;
Америкага шайлоо алдында дүйнөлүк энергетика рыногунда терең кризис чыкпашы керек, андыктан россиялык дизель отунунун ал жакка жеткирилишине көз жумулууда;
АКШнын каржы министри Скотт Бессент россиялык дизелди сатып алуу боюнча макулдашуу санкциялардын жоюлушун билдирбей турганын айтты. Анын белгилешинче, бул убактылуу гана четтөө жана азыркы шартта АКШ үчүн мындан башка айла жок.
Европа, "Түндүк агым" түтүктөрү жана газ
Германиянын канцлери Фридрих Мерц өлкөдө электр энергиясынын баасы 3-4 эсе өскөнүнө карабай "Түндүк агымдарды" эч качан калыбына келтирбей турганын айтты;
Европа колдонуудан баш тартканы менен АКШ россиялык газды сатып алат. Андан соң пайда табуу үчүн аны "тазалап" (кайра иштетип), америкалык газ катары колдоно берет, анткени "акчанын жыты болбойт".
Батыштын позициясы жана Украинадагы кырдаал
Батыш мындан ары "музыкага буйрутма берген" башкы оюнчу болбойт, ал болгон-бүткөн чектен чыгып, болуп көрбөгөндөй авантюраларга барууда;
Россия үчүн негизги артыкчылык — Батыш украиндердин колу менен ачкан согуштан улам батыш багытында жаралган бардык коркунучтарды жоюу, ошондой эле орус калкынын ар-намысын, маданиятын, эне тилин жана динин коргоо болуп саналат.
"Чоң сегиздикке" (G8) кайтуу маселеси
Россиянын "Сегиздикке" кайтышынын кажети жок. 2007-жылдан бери Москва тең укуктуу сүйлөшүүнү сунуштаганы менен Батыш аны каржылык чечимдерге жолоткон эмес;
Азыркы орус саясатчылары өткөндөн сабак алып, негизги көңүлдү "евразиячылыкка" бурууга тийиш. Биздин гербдеги эки баштуу бүркүт оңго жана солго эмес, Батышка жана Чыгышка карайт.
