Мамлекет субсидия бербесе, бензин 120 сомго чыкмак. Баа канчага чейин кармалат?

“Бүгүнкү күндө Кыргызстанда бензиндин баасы 87 сом 90 тыйын, дизель майы 99 сом 90 тыйын, ал эми газдын баасы 48 сом 80 тыйын деп белгиленген. Аймактарда баа транспорттук чыгымдарга жараша бир аз айырмаланышы мүмкүн. Субсидиялоо боюнча май, июнь жана июль айларында мамлекеттик бюджеттен 1 миллиард 144 миллион сом жумшалды. Ал эми август айында алдын ала эсептөөлөр боюнча дагы 1 миллиард сом каражат багытталды. Демек, мамлекет бир литр бензинге 31 сомго чейин, дизель майына 42 сомго чейин, газга 5,5 сомго чейин субсидия берип жатат. Эгер субсидиялоо механизми жана жөнгө салуу чаралары болбогондо, акциздик салыктын төлөө мөөнөтү жылдырылбаганда май куюучу жайларда бензиндин баасы 120 сомго, дизель майы 140, газдын баасы 55 сомго чейин жетмек. Бул чаралар инфляцияны кармап турууга оң таасирин тийгизип жатат", — деди Бекташов.