Дайырбекова: биз чыгарган белбоолорду жаштар “кэжуал” стили менен айкалыштырып жатат
"Эже мени Наргиза деген кыз менен иштешүүгө чакырды.Жасап көрүп, алгач өзүм тагынып сынап баштадым. Кийин туугандарыма да берип, алардын пикирин сурадым. Анткени биз үчүн белбоо чындап эле аялдарга ыңгайлуу болобу, күнүмдүк жашоодо колдонууга мүмкүнбү, кандай өзгөртүүлөр керектигин түшүнүү зарыл эле. Айрыкча төрөттөн кийинки 40 күн аял үчүн абдан маанилүү мезгил. Ошол мезгилде белбоо аялга өзүн ишенимдүү сезүүгө, белин кармап турууга жардам бергендей сезилет. Аял киши үй жумушун кылганда да белбоону тагынып алса, өзүнө кошумча бир колдоочудай болуп турат. Ошондуктан биз белбоону бир гана салттуу буюм катары эмес, аялдын күнүмдүк жашоосунда колдонууга ыңгайлуу кылгыбыз келди. Ошондон бери белбоонун формасын, материалын, ыңгайлуулугун улам жакшыртып келе жатабыз. Кооздугуна да көңүл бурдук. Белбоо күнүмдүк жашоодо да стилдүү көрүнсүн деп ага айгүлдүн жана анардын саймаларын коштук. Азыр аны жаш кыздар да жактырып, "кэжуал" стилиндеги кийимдеринин сыртынан кийип жүрүшөт”, — деди Дайырбекова.
