Кыргызстанда мамкызматта бир жыныстын өкүлдөрү 70%дан ашпоого тийиш. Жаңы мыйзам
© Sputnik / Павел Бедняков
/ Жазылуу
БИШКЕК, 21-июл. — Sputnik. Президент Садыр Жапаров гендердик теңчилик маселелери боюнча мыйзамга кол койду.
Ага ылайык, мамлекеттик жана муниципалдык органдардын кадрдык курамында бир жыныстын өкүлдөрү 70 пайыздан ашпоого тийиш. Бул талап чечим кабыл алуучу кызматтарды да камтыйт.
Негизги өзгөртүүлөр:
мамлекеттик жана муниципалдык кызматка кабыл алууда, кызмат боюнча көтөрүүдө жана кадрлар резервин түзүүдө аялдар менен эркектердин тең санын камсыз кылуу талап кылынат. Эгер бир кызмат ордуна квалификациясы бирдей эки талапкер өтсө, артыкчылык ошол мекемеде саны аз болгон жыныстын өкүлүнө берилет;
бирдей бааланган эмгек үчүн аялдар менен эркектерге бирдей эмгек акы төлөнүшү керек. Ошондой эле жумуш жарыяларында "эркектер гана" же "аялдар гана" деп жазууга, эгер ал иштин табияты сөзсүз ушуну талап кылбаса, тыюу салынат;
мыйзамда үй-бүлөлүк милдеттерди аткаруу аялдардын гана эмес, эркектердин да бирдей жоопкерчилиги экени белгиленип, баланы же жардамга муктаж жакындарын кароо кызматкерди жумуштан бошотууга негиз боло албасы жазылган;
документ ошондой эле жумуш орундарында сексуалдык асылууга жана гендердик зомбулукка каршы талаптарды күчөтөт. Иш берүүчүлөр мындай көрүнүштөрдүн алдын алуу боюнча ички тартиптерди иштеп чыгып, кызматкерлердин даттанууларын купуя кароого милдеттүү болот;
эгер адам жынысына байланыштуу жумушка алынбаса, айлыгы аз төлөнсө, кызматтан мыйзамсыз четтетилсе же сексуалдык асылууга кабылса, ал сотко, прокуратурага же акыйкатчыга кайрыла алат.
Документ расмий жарыяланган күндөн тартып он күн өткөндөн кийин күчүнө кирет.
