Жапаров: жер чет элдиктерге сатылбайт, мамлекеттин менчиги бойдон калат
Жазылуу
БИШКЕК, 17-июл. — Sputnik. Президент Садыр Жапаров "Кабар" агенттигине маек куруп, коомдо кызуу талкууланып жаткан чет элдиктерге 50 жылга чейин ижарага жер берилет деген нааразычылыкка жооп берген.
Өлкө башчысы токтолгон урунттуу учурлар:
чет элдик инвесторлорго жерди узак мөөнөткө ижарага берүү көп жылдан бери колдонулуп келген механизм. Азыр мамлекет аны дагы да тартипке салып, жоопкерчиликти күчөтүп жатат;
Жер кодекси боюнча чет элдиктер жерди менчиктей албайт. Белгилүү мөөнөткө ижара акысын төлөп, пайдалануу укугун гана алышат. Жер мамлекеттин менчиги бойдон калат;
инвестор жерди ижарага алып, бирок белгиленген мөөнөттө объект куруу, жумуш орундарын түзүү сыяктуу милдеттерин аткарбаса, мамлекет жерди кайтарып алат;
инвестор жерди кайсы максат менен алса, дал ошол долбоорду гана ишке ашырат. Завод үчүн алган болсо, завод курулат, логистикалык борбор үчүн алган болсо, логистикалык борбор салынат;
мамлекетке таандык ижарадагы жер тилкесин же аны пайдалануу укугун күрөөгө коюуга жол берилбейт. Жер мамлекеттин менчиги бойдон калат жана ал эч кандай күрөөнүн предмети болбойт;
чек арага жакын аймактардагы жана айыл чарба жерлери чет элдиктерге берилбейт. Мындай жерлер мамлекеттин улуттук коопсуздугуна байланыштуу өзгөчө көзөмөлдө.
