Элден млн. доллардан ашык шыпырып кетишкен. ИИМ Antares Trade боюнча билдирүү таратты
© Фото / пресс-служба МВД КР
Жазылуу
БИШКЕК, 29-июн. — Sputnik. Бишкекте каржылык пирамида ыкмасын колдонуп адамдарды алдады деп иши сотко өтүп, бирок Кыргызстандан чыгып кеткен кишинин интернет аркылуу айткандарына түшүндүрмө берди.
Кеп Antares Trade каржы пирамидасынын ишмердүүлүгүнө байланыштуу кылмыш иши боюнча айыпталуучулардын биринин маалыматы туурасында болуп жатат.
ИИМ төмөнкүлөрдү билдирди:
ИИМдин Тергөө кызматы Antares Trade каржы пирамидасын уюштуруу жана анын мыйзамсыз ишмердүүлүгү боюнча кылмыш ишти ар тараптуу, толук жана объективдүү иликтеген;
тергөөдө аныкталгандай, 2020-жылдын октябрь айынан 2021-жылдын июль айына чейинки мезгилде чет мамлекеттин жарандары С.Т., Д.М., Ч.Х., ошондой эле кыргызстандык Т.Т. алдын ала сүйлөшүп алып, КРдин аймагында каржы пирамидасынын белгилерине негизделген инвестициялык схеманы уюштурат;
2020-жылдын октябрынан 2021-жылдын июлуна чейин алар жакшы кирешени убадалап, Бишкектеги соода борборлордун биринде компаниянын кеңсесин ачып, презентацияларды жана жолугушууларды үзгүлтүксүз өткөрөт;
компаниянын Кыргызстанда каттоодон өтпөгөнү жана реалдуу инвестициялык ишмердүүлүк жүргүзбөгөнү аныкталган;
тергөө учурунда элдин акчасын мыйзамсыз алгандыктарына байланыштуу 50 эпизод бир өндүрүшкө бириктирилген. Жабырлануучуларга келтирилген жалпы материалдык зыяндын өлчөмү 1 миллион 61 миң 198 долларды чапчыган;
кылмыш иш боюнча олуттуу тергөө жүргүзүлүп, жетиштүү далилдер топтолгон. Анын негизинде 2021-жылдын декабрында тергөө аяктап, кылмыш иши маңызы боюнча кароо үчүн сотко жөнөтүлгөн. Соттук кароонун жүрүшүндө С.Т., Д.М., Ч.Х. жана Т.Т. сот отурумдарына келбей, соттон качкан. Ушуга байланыштуу аларга издөө жарыяланып, учурда издөө иш-чаралары улантылууда.
эгер айыпталуучуда кылмыш иши үчүн мааниге ээ кандайдыр бир далилдер болсо, аларды социалдык тармактар аркылуу эмес, мыйзамда белгиленген тартипте сотко көрсөтүүгө тийиш.
Эске салсак, милиция Бишкекте каржылык пирамида ыкмасын колдонуп адамдарды алдап кетти делген үч киши кармалды деген маалыматты мындан беш жыл мурда тараткан. Анда кеп 35 миң доллар туурасында болгон.
