Ысык-Көл эл аралык форумунун резолюциясы кабыл алынды. Урунттуу учурлары
14:29 20.06.2026 (Жаңыртылды: 17:13 20.06.2026)
© Sputnik / Антон Слонь
Жазылуу
БИШКЕК, 20-июн. — Sputnik. Ысык-Көл эл аралык форумунун катышуучулары атайын резолюция кабыл алышты. Бул тууралуу Кыргызстандын мамлекеттик катчысы Арслан Койчиев форумдун жыйынында жарыялады.
Анын айтымында, үстүбүздөгү жылдын 18-21-июнь күндөрү өтүп жаткан форумга дүйнөнүн 15 өлкөсүнөн келген кадырлуу коноктор, анын ичинде Нобель сыйлыгынын лауреаттары, белгилүү окумуштуулар, маданият жана саясий ишмерлер катышты.
"Залкар жазуучу Чыңгыз Айтматов тарабынан 1986-жылы негизделген бул форум бүгүнкү күндө глобалдык идеологиялык карама-каршылыктар курчуп турган шартта кайрадан күн тартибине коюлууда. Форум жаңыча ой жүгүртүү жана руханий экология концепцияларын өнүктүрүүгө, өзөктүк коркунучту азайтууга жана дүйнөлүк коомчулуктун трансформациясына таасир этүү максатын көздөйт", — деди Койчиев.
Мамлекеттик катчы окуган резолюцияда адамзат туш болгон геосаясий чыңалуу, куралдуу кагылышуулар, климаттык өзгөрүүлөр жана социалдык-экономикалык теңсиздик сыяктуу системалык кризистер белгиленип, негизги чечимдер кабыл алынганы айтылды.
Резолюциянын негизги пунктулары:
Жазуучунун руханий экология жана жакшылык кылуу идеяларына негизделген принциптерди улуттук жана аймактык өнүктүрүү стратегияларына интеграциялоо
Мамлекет башчыларын согуштарды токтотууга жана чыр-чатактарды тынчтык, конструктивдүү диалог жолу менен чечүүгө чакыруу
Эл аралык коомчулукту жана жергиликтүү коомчулукту жаратылышты коргоого жана биосфералык аймактарды сактоого үндөө
Форумга эл аралык статус берүү жана ядросуз, коопсуз дүйнөнү жайылтуу боюнча өнөктөштөрдүн тизмесине киргизүү үчүн БУУга кайрылуу жолдоо
Иш-чараны ар бир 4 жылда бир жолу Кыргызстанда Ысык-Көлдүн жээгинде өткөрүп туруу
Ысык-Көл эл аралык форумунун коомдук башталышта иш жүргүзө турган туруктуу Координациялык кеңешин, катчылыгын Бишкек шаарында түзүү
ЮНЕСКОго гуманизм, жазуучунун чыгармачылыгы, ошондой эле жергиликтүү жана глобалдык деңгээлдеги кайрымдуулук тууралуу заманбап басылмалар чагылдырыла турган "Ысык-Көл форуму" онлайн-альманахын түзүүнү сунуштоо
Планетардык гуманизм экология жана маданий өзгөчөлүктүү сактоо темаларын иштеп чыккан жаш изилдөөлөр үчүн Чыңгыз Айтматов атындагы эл аралык стипендияны уюштуруу демилгесин көтөрүү
Ушул резолюцияда көрсөтүлгөн сунуштар менен демилгелерди колдоо максатында абройлуу эл аралык уюмдарга жөнөтүү.
Мындан сырткары, жыйында 2028-жылды — Чыңгыз Айтматовдун 100 жылдык мааракесине утурлай БУУ деңгээлинде "Чыңгыз Айтматов жылы" деп жарыялоо демилгеси сунушталды.
