Өлкөдө облус жетекчилеринин орун басарлары, акимдер, мэрлер алмашты. Тизме
© Sputnik / Павел Бедняков
/ Жазылуу
Азырынча төрт мэр, үч аким кызматка келип, үч облус башчыларынын орун басарлары алмашты.
БИШКЕК, 31-мар. — Sputnik. Кыргызстанда президенттин үч облустагы ыйгарым укуктуу өкүлдөрүнүн биринчи орун басарлары, бир нече райондор менен шаарлардын жетекчилери алмашты.
Бул документтерге президент Садыр Жапаров жана министрлер кабинетинин төрагасы Адылбек Касымалиев кол койгон.
Облустар боюнча:
Мирлан Орозбаев президенттин Ош облусундагы ыйгарым укуктуу өкүлүнүн биринчи орун басары болуп дайындалып, ал эми бул кызматта иштеген Илияз Ташбаев Чүй облусунун Москва районуна акимдикке барды;
Уларбек Исмаилов президенттин Жалал-Абад облусундагы ыйгарым укуктуу өкүлүнүн биринчи орун басары болуп дайындалды;
Жылдыз Мамбетова президенттин Нарын облусундагы ыйгарым укуктуу өкүлүнүн орун басары болду.
Алмашкан мэрлер:
Жылдызбек Беккелдиев Нарын шаарынын мэри болуп дайындалып, ага чейин УКМКнын экс-жетекчиси Камчыбек Ташиев аталган кызматка алып келген Жайнак Немат уулу иштен кетти;
Алмаз Байгазиев Жалал-Абад облусунун Майлуу-Суу шаарынын мэри болуп дайындалып, Алтынбек Жумаев аталган кызматтан кетти;
Эдилбек Тажимырзаев Жалал-Абад облусунун Кара-Көл шаарынын мэри болуп дайындалып, Нуртилек Орозбаев иштен алынды;
Бакытбек Кошалиев Баткен облусунун Кызыл-Кыя шаарынын мэри болуп дайындалды.
Алмашкан акимдер:
Темирболот Абыкеев Жалал-Абад облусунун Ала-Бука районунун акими болуп дайындалып, Руслан Айтбаев иштен кетти;
Алтынбек Бектуров Жалал-Абад облусунун Базар-Коргон районунун акими болуп дайындалып, Талантбек Эдилов иштен бошоду;
Ниязбек Козуев Чүй облусунун Москва районунун акими кызматынан бошотулуп, жогорудай жазгандай Илияз Ташбаев келди.
