"Ширшовдун өлкөгө пайдасы болсо колдонобуз". Жапаров бизнесмен тууралуу үн катты
13:32 23.02.2026 (Жаңыртылды: 13:38 23.02.2026)
Жазылуу
БИШКЕК, 23-фев. — Sputnik. Президент Садыр Жапаров кезегинде Максим Бакиев менен коюн-колтук алышып жүргөн өнөктөштөрүнүн бири Алексей Ширшовдун Кыргызстанга келиши, аны менен иштешүү тууралуу "Кабарга" берген маегинде айтты.
Эске салсак, минкаб төрагасынын орун басары, энергетика министри Данияр Амангелдиев жетектеген кыргыз делегациясынын Москвадагы иш-чарасында Ширшовдун катышып отурган сүрөтү тараган.
Төмөндө Жапаровдун айткандарынын урунттуу жерлери:
2021-жылдын аягында Ширшов ортомчулар аркылуу кайрылган. "Мени камабаса Кыргызстанга барат элем, Максимдин (Бакиев – ред.) чет өлкөдөгү жана Кыргызстандагы активдерин билем, ошолорду ачыктап, мамлекетке кайтарууга жардам берет элем" дептир. Күч органдарынан сурасам Ширшов издөөдө эмес экен, келди;
"Максим менен бирге жакшы эле байыгансыңар. Эми ошол байлыктарды мамлекетке кайтарганга жардам бер. Сенде болгон маалыматтарың менен бөлүш" деп шарт койдук. УКМК, ИИМ менен кызматташып иштей баштады;
"Аврора Плюста" кайсы коттедждерди кимдер рейдерлик кылып, жакын туугандарына же досторуна каттатып алганы боюнча маалыматы менен бөлүштү. Ошентип "Аврора Плюстан" бир канча коттедж, бир канча батир мамлекетке өттү;
Москвадагы сүйлөшүүлөргө катышуусу боюнча. Жогорку Нарын ГЭСтеринин карызы боюнча сүйлөшүп келгенге Данияр Амангелдиев баштаган делегацияны Москвага жибергем. Амангелдиевге телефон чалып, "Русгидро" боюнча Кыргызстанга пайдалуу маалымат менен бөлүшөм деп сүйлөшүүлөргө кошулуп калыптыр. Себеби илгери ошолор менен иштешип жүргөн;
Ширшовго илгеркидей бир министрликти минип алып башкарганга жол бербейбиз. Мамлекетке пайдасы болсо колдонобуз, жок болсо "тынч жүр" дейбиз. Кыскасы, мамлекеттик казынага кол салууга жол бербейбиз. Ошондуктан Ширшов менен "манипуляция" кыла бергендерге көңүл бурбаш керек.
