Жаңжал чыгарын уккан... Президент Жапаров кыргыз-тажик чырына токтолду
Жазылуу
БИШКЕК, 6-янв. — Sputnik. Кыргыз менен тажиктин ортосунда согуш болот деген маалыматтар мага алдын ала келген. Бул тууралуу Садыр Жапаров “Президент” даректүү тасмасында билдирди.
Анын айтымында, мындай маалымат ага чет мамлекеттерден түшкөн.
“Ошондо ошол кездеги коргоо министри Өмүралиев жана Коопсуздук кеңешинин башчысы генерал Мусаев менен жолугуп, силерде ушундай маалымат барбы десем, экөө тең “жок” дешкен”, — деди өлкө башчы.
Жапаровдун чек ара боюнча кебинин урунттуу учурларын тезис менен беребиз:
3-апрелде Баткенде машыгуу өтмөк экен. Сактыкта кордук жок деп техниканын баарын түштүккө жөнөтүү тапшырмасын бергем
Кыргыз-тажик жаңжалы башталганда түнү менен иштеп, эртеси Рахмон менен байланышкам. Сизге барайын, жүзмө-жүз отуруп чечели деп сунуштагам. Ошондо Рахмонго “на поклон” баратасың дегендер чыкты
Рахмон менен Душанбеде бир кабинетте 10 саат талашып-тартышып отуруп, бир чечимге келе алган эмеспиз
"Байрактар", "Аксүңгүр" дрондорун алдыруу үчүн 1 жылдан ашык убакыт керек экен. Ошондо Түркияга сапар сурадым. Бирок Атамбаев Эрдоганды катуу таарынтып койгон экен, кыргыздар үчүн тарых барагын жаптыртып коюптур. 1 адам үчүн 7 млн кыргызды жерибе деп Эрдоганды жибитип, 1 комплект "Байрактарды" алып келдик
14-сентябрда кайрадан чек ара жаңжалы чыкканда “Байрактар” катуу жардам берди. Күчүбүз теңелип калды. Ал эми 2023-жылы армиябыз алардан эки эсе күчтүү болуп кетти, анткени “Акынжы”, “Аксүңгүрдү” алып келгенбиз. Ошондон кийин тил табышуу жеңил болду
Саммиттерде жолугушкан кезде Рахмонго “отуруп сүйлөшөлү” деп сунуштадым. Алгач баш тартты. Анан экинчисинде жибиди. Буга Шавкат Мирзиёевдин эмгеги зор. Ал “чече турган киши келип жатат, кийин дагы эмне болот” деп атып көндүрдү. Ошентип отуруп чек араны чечтик
Жапаров соңунда Тажикстандан кийин Өзбекстан менен да чек ара маселеси ийгиликтүү чечилгенин кошумчалаган.
31 Бештин айы 2025, 23:58
