Жапаров ишкерлерге жеңилдиктер каралган мыйзамга кол койду
Жазылуу
БИШКЕК, 31-дек. — Sputnik. Президент Садыр Жапаров "Салык салуу, социалдык камсыздандыруу жана салыктык эмес кирешелер чөйрөсүндөгү айрым мыйзам актыларына өзгөртүүлөрдү киргизүү жөнүндө" мыйзамга кол койду. Бул тууралуу өлкө башчынын маалымат катчысы Аскат Алагөзов билдирди.
Мыйзам “Экономиканын айрым тармактарын колдоо боюнча чаралар жөнүндө” жарлыкты ишке ашыруу максатында чыккан.
Анда ишкерлерге, юридикалык жана жеке жактарга бир катар жеңилдиктер каралган.
Мыйзамдын негизги ченемдери:
зергерлик үчүн арналган жабдуу, технология, реактивдер жана жарым фабрикаттар үчүн кошумча нарк салыгы алынды;
зер буюмдары менен атайын эсепке турбай иш жүргүзүү үчүн жоопкерчиликти караган жаңы 295¹-берене киргизилди (жеке жактар үчүн айып пул – 5000 сом, юридикалык жактар үчүн – 13000 сом);
баалуу металлдан жасалган зер буюмдарын 2 айдын ичинде легалдаштыруу, легалдашуу мезгилинде салык кызматынын органдары тарабынан жүргүзүлгөн текшерүүлөргө мораторий киргизүү;
2029-жылдын 1-январына чейин транспорт каражаттарын сатууда юридикалык жана жеке жактар салык төлөөдөн бошотулду;
2026-жылдын 1-январына чейинки транспорт каражаттарын кайра экспорттоодогу жеке жактардын салыктык карызын эсептен чыгаруу каралган;
Кыргызстандын ишканалары өндүргөн жана чогултулган транспорттук каражаттарды, аларга комплекттелген буюмдарды сатууда салыктан бошотулат;
2030-жылдын 1-январына чейин тигүү жана текстиль өнөр жай кызматкерлеринин орточо айлык акысынан алынуучу киреше салыгын минималдуу 1 пайыз жана алардын бардык субъектилери үчүн орточо айлык акынын өлчөмүнөн камсыздандыруу төгүмдөрүнүн бирдиктүү ставкалары белгиленген;
мүлкүн ижарага бергендер үчүн камсыздандыруу төгүмдөрүнүн ставкасы жеке ишкерлер үчүн белгиленген ставкага барабар, башкача айтканда, орточо айлык акынын кыскартылган суммасынын 6 пайызы белгиленген;
Кыргызстандын аймагынан тышкаркы ишмердүүлүк үчүн бирдиктүү салыктын ставкасы 0,1 пайызга чейин төмөндөтүлдү (учурда ал 1 пайыз);
чет мамлекеттин банкы аркылуу жүргүзүлгөн транзакцияга салыктын ставкасы 0,1 пайызга чейин төмөндөтүлдү (учурда ал 0,2 пайыз);
алкоголдук продукцияны чекене сатууга лицензия берүү алып салынды;
арбитраждык соттордун карамагынан салыктык талаштарды кароо алып салынды.
Мындан тышкары, Укук бузуулар жөнүндө кодекске өзгөртүүлөр киргизилди:
ЕАЭБге мүчө мамлекеттердин чек арасы аркылуу товарларды жана транспорт каражаттарын мыйзамсыз алып өткөнү үчүн 311-берене боюнча жоопкерчилик күчөтүлдү. Жеке жактар үчүн айып 10000 сомдон 20000 сомго чейин, юридикалык жактар үчүн 28000 сомдон 65000 сомго чейин көтөрүлдү. Жыл ичинде кайталап жасалган аракеттер үчүн жеке жактарга 20000 сомдон 40000 сомго чейин, юридикалык жактар 65000 сомдон 100 000 сомго чейин айып салынат. Эреже бузуу кайталана берген учурда товарларды жана транспорт каражаттарын конфискациялоо каралган.
Мыйзам 2025-жылдын 24-декабрында Жогорку Кеңеш тарабынан кабыл алынган.
