3D менен басып чыгарууну өндүрүштүн дээрлик бардык тармагына киргизсек болот
13:41 15.12.2025 (Жаңыртылды: 10:20 16.12.2025)
© Sputnik / Асель Акмат
Жазылуу
Изилдөөчү экономист Улукман Мамытов аддитивдик технологияны өлкөнүн өндүрүш тармагына колдонуу зарыл деп эсептейт.
Аддитивдик технология, жөнөкөй тил менен айтканда, 3D басмасы – бул учурда өндүрүшчүлөргө чоң көмөкчү болуп келе жаткан технология. Дүйнө жүзү боюнча жаңыдан кирүүдө. Кыргызстан да ушул тенденцияны колдонуп калышы шарт. Мындай пикирин Улукман Мамытов Sputnik Кыргызстан радиосуна маек куруп жатып билдирди.
Анын айтымында, 3D технологиясы үч тарабынан көрүп, жасоо дегенди түшүндүрөт.
"Аддитивдик технологиянын пайда болгонуна деле аз гана болду. Ошондуктан да Кыргызстанда анчейин колго алына элек. Өндүрүштүн айрым анча татаал эмес тармактарында колдонулуп баштаганына күбө болуп калуудабыз. Бирок биздики сыяктуу экономикасы чакан өлкөлөр үчүн бул абдан керектүү жабдуу болуп калчудай. Мисалы, ошол эле курулуш тармагын алалы, биздин тоолуу өлкөдө бийик жактарга курулуш үчүн керектелүүчү техника, материалдарды ташып отурбай эле 3D жабдуусун алып барып, ошол жердин топурак-ташы менен там салсак болот. Болбосо, өндүрүштүн башка тармактарында колдонуу менен биз биринчиден катасыз, туура кадамдарды жасап, материал жана убакытты үнөмдөйбүз. Ошол эле тигүү тармагында жана башка өндүрүштөрдүн дээрлик бардыгында бул жабдууну колдонсок болот. Ал үчүн мамлекет жеке ишкерлер менен бириккен программалар боюнчабы же түрдүү фонддор аркылуубу, өлкөгө ушундай 3D-жабдууларды чыгарган мекеме ачса, аны биздин Исхак Раззаков атындагы Кыргыз мамлекеттик университети сыяктуу окуу жайларда даярдалып чыккан адистер ишке киргизсе эмнеге болбосун", — деди Мамытов.
Экономист учурда аталган техникалык окуу жайда бул багытта лаборатория ачылганын кошумчалады.
