Мамытов: кыргыз бизнесинде ресурстар туура колдонулбай жатат
Жазылуу
Экономист Улукман Мамытов өлкөдө ишкерликти өнүктүрүүчү жагдайларга токтолду.
Кыргыз ишкерлери бизнес жүргүзүүдө менеджментти өнүктүрүүсү зарыл. Мындай пикирин Улукман Мамытов Sputnik Кыргызстан радиосуна маек куруп жатып билдирди.
Анын айтымында, ишкерликтеги менеджерликти төрткө бөлүп кароого болот.
"Бизде коом абдан шамдагай. Бирок ишкер болууда бир эле шамдагайлык аздык кылат. Менеджмент — бизнестин ажырагыс бөлүгү, бардык тармактарга керек, бизнесте ансыз өнүгүү болбойт. Менеджмент дегенде эле биз башкарууну түшүнбөшүбүз керек. Ал жалпысынан төрт бөлүктөн турат. Биринчиси — пландоо, кантип өндүрөм, канча көлөмдө, сырьену кайдан алам, каякка сатам деген сыяктуу. Экинчиден, ошол планды ишке ашыруу. Үчүнчү маселе — жасалган продуктуну текшерүү. Бул абдан терең мамилени талап кылат. Андан кийин кемчиликтерди оңдоого, сапатын арттырууга аракет жасалат. Мына ушул төрт маселе жолго салынган соң гана бизнести кеңейтүү тууралуу ойлонуу керек. Бизде мейли өндүрүш, мейли башка тармактагы ишкерлик болсун, ирилеше албай жатканыбыздын да негизги көйгөйү ушул. Жетекчи жөн эле башкарма болбой чыныгы менеджер болсо, менеджментти мыкты өздөштүрсө, бизнести алып кетүү оңой болот", — деди Мамытов.
Экономист менеджментте кайсы бир коомго же улутка ылайыкташканына карабай анын иштеп кетерине жана бизнестин туура келген түрүнө басым жасоо зарылдыгын кошумчалады.
