Путин энергетикалык жумалыкта эмнелерге токтолду. Урунттуу жерлери
19:04 16.10.2025 (Жаңыртылды: 09:30 17.10.2025)
© Sputnik / Григорий Сысоев
/ Жазылуу
БИШКЕК, 16-окт. — Sputnik. РФтин президенти Владимир Путин "Россия энергетикалык жумалыгы" эл аралык форумунда сүйлөп, бул тармактын эл аралык жана аймактык маселелерине токтолду.
Төмөндө Россия лидеринин айткандарынын негиздүү учурларын сунуштайбыз:
Россиянын энергоресурсунан баш тартып, Евробиримдик экономикасын жабыркатып жатат. ЕБдин моюн толгошу багытыбызды өзгөрттү жана бизге пайдалуу болду;
Россия адилетсиз атаандаштыкка карабастан мунай өндүрүү боюнча дүйнөдөгү алдыңкы өндүрүүчүлөрдүн бири катары өз позициясын сактап келет. 2025-жылы Россияда мунай өндүрүүнүн кыскарышы ОПЕК+ алкагындагы макулдашууларга байланыштуу;
Батыштын аракети энергетикалык архитектуранын жасалма бузулушун шарттады. Россиянын энергоресурстарысыз Европанын өнөр жайы кыйрап, баа асмандап жатат;
Россия өзөктүк энергетика жаатында эч кимди алдына салбайт жана эч кимге көз каранды эмес. Атом тармагындагы нерселердин баары Россияда жасалат;
"Росатом" дүйнөлүк атомдук станция куруу рыногунун 90 пайызын ээлейт. Россия 15 жылда АЭСтерден 29 гигаваттан ашык кубаттуулукту ишке киргизүүнү пландап жатат;
энергетика рыногу жеткирүүлөрдүн жана маршруттардын кайра түзүлүшүн баштан кечирип жатат. Мындан улам логистиканын, энергоресурстардын Глобалдык Түштүккө, Азия-Тынч океан аймагынын динамикалуу өлкөлөрүнө, Африкага, Латын Америкасына карай которулушу жүрүп жатат;
Россиядагы газдаштыруу деңгээли 75 пайызды түзөт. Акыркы төрт жыл ичинде дээрлик бир миллион кожолук түтүк аркылуу берилүүчү жаратылыш газына кошулду. Эми дагы 2 миллионго жакын үйдүн кошулушу күтүлүүдө.
Көмүр азыркыга чейин дүйнөлүк энергия балансынын олуттуу бөлүгүн ээлеп келет. Путин өкмөткө маалымат борборлорунун муктаждыктарын камсыздоо үчүн көмүр менен иштеген электр станцияларын пайдалануу мүмкүнчүлүгүн карап чыгууну тапшырды.
Маалымат үчүн: мындай борборлордун ичинде миңдеген серверлер (компьютерлер) тынымсыз иштейт. Алар электр энергиясын көп керектешет жана жакшы муздатуу системасын талап кылат.
"Россиянын энергетикалык жумалыгы" форуму — азыркы отун-энергетикалык комплексинин өнүгүүсүнүн актуалдуу тенденцияларын талкуулоо үчүн түзүлгөн негизги эл аралык аянтчалардын бири. Иш-чара салт боюнча энергетика тармагындагы эң ири компаниялардын жетекчилеринин катышуусунда жогорку деңгээлде өтөт. Форум мыйзам чыгаруу жана аткаруу бийликтеринин өкүлдөрүн, ири энергетикалык компаниялардын лидерлерин, чет мамлекеттердин бизнес-өкүлдөрүн, окумуштууларды жана эксперттерди, жаш энергетиктерди, 80ден ашуун өлкөдөн келген федералдык жана аймактык ЖМКлардын журналисттерин бириктирет.
