Путин: Россия 2030-жылы дүйнөдөгү биринчи өзөктүк энергосистеманы ишке киргизет
21:02 25.09.2025 (Жаңыртылды: 09:57 26.09.2025)
© Sputnik / Сергей Булкин
/ Жазылуу
БИШКЕК, 25-сен. — Sputnik. РФ президенти Владимир Путин Москвадагы ВДНХда өтүп жаткан Глобалдуу өзөктүк форумда сүйлөп, жаңы технологиялар жана өзөктүк тармактын келечеги тууралуу айтканын РИА Новости жазды.
Өлкө башчысы Россия жакын арада суудагы АЭСтерди кура баштаарын, ал эми 2030-жылы дүйнөдөгү биринчи өзөктүк энергосистеманы ишке киргизерин белгиледи.
“Россиялык дизайн менен курулган атом станциялары коопсуз, тышкы таасирге туруштук бере алгандыгынан улам дүйнөдө ага суроо-талап күч болот”, — деди Путин.
РФ лидери жасаган билдирүүнүн урунттуу учурлары:
Россия өзөктүк технологиялар боюнча өнөктөштөрүнүн алдындагы милдетин толугу менен аткарууда, узак мөөнөттүү долбоорлорду ишке ашырууга кызыкдар;
Москва бул багыттагы өнөктөштөрүнө өнүгүүгө жардам берип, технологиялык колониализмди жектейт;
тынчтык атому жаатындагы технологиялардын бардык тарапка бирдей жеткиликтүүлүгү глобалдуу өнүгүүнү камсыздайт;
тынчтык атомун өнүктүрүү менен өзөктүк куралды жайылтпоо режимин бекемдөөнүн ортосундагы туруктуу баланс сакталышы керек;
өзөктүк циклдин, анын ичинде уран казуу жана реакторлорду пайдалануу баскычтарында коопсуздукка талап дайым катаал болушу шарт;
божомол боюнча, планетада уран 2090-жылга жакын түгөнөт, андан эрте да болушу мүмкүн. Россиялык илимпоздордун революциялык табылгасы атом энергетикасынын аталган элементке муктаждыгын толугу менен жоет;
өнүгүү үчүн атомдон энергоресурс алууга кызыкдар мамлекеттердин саны өсүүдө, коомчулукта атом энергетикасын табигый таза технология катары кабылдоо байкала баштады;
дүйнөдө жаңы технологиялык көз караш калыптанууда. Россия өзүнүн АЭСтеринде дата-борборлорду түзүп жатат;
тынчтык атомуна суроо-талапты Глобалдуу Түштүк менен Чыгыш мамлекеттери өстүрөт.
“Дүйнөлүк атом жумалыгы” аталышындагы форум бүгүн башталды. Россиянын өзөктүк өнөр жайынын 80 жылдыгына арналган иш-чара 28-сентябрда жыйынтыкталат.
Форумга 118 мамлекеттин өкүлдөрү катышууда.
Жыйын алдында Путин “Атом” павильонунда чет элдик делегациялардын башчылары менен баарлашты. Жолугушууга МАГАТЭнин башкы директору Рафаэль Гросси, Беларусь президенти Александр Лукашенко, Армения премьери Никол Пашинян, Мьянма президентинин милдетин аткарып жаткан Мин Аун Хлайн, Эфиопия премьери Абий Ахмед жана Иран, Өзбекстан, Египет, Нигердин өкүлдөрү катышкан.
