Мамытов: ИДПнын өсүшүнө курулуш тармагы түрткү берүүдө
© Sputnik / Арууке Амирдинова
Жазылуу
Жусуп Абдрахманов атындагы Президентке караштуу мамлекеттик башкаруу академиясынын жаңы экономика кафедрасынын жетекчиси, экономист Улукман Мамытов өлкөдөгү курулуш тармагынын келечегине токтолду.
Учурда Кыргызстанда курулуш багыты абдан күүлөнүп баратат. Жөн гана үйлөр эмес, кичи райондор, шаарчалар салынууда. ЕАЭБ мамлекеттеринин ичинен бул тармакта алдыдабыз. Бул, албетте, жакшы, бирок ойлончу да маселелер жок эмес. Мындай пикирин Улукман Мамытов Sputnik Кыргызстан радиосуна маек куруп жатып билдирди.
Анын айтымында, өлкөнүн ички дүң продукциясынын өнүгүшүнө курулуш тармагынын салымы чоң болууда.
"Учурда бизде курулуш тармагы дүркүрөп баратат десек болот. Айрым эксперттер "бул багытта алдыда 2008-жылдагы Америкадагыдай кризис күтпөйбү" деп кооптонушууда. Менимче, андай болбойт. Анткени биз башка системада баратабыз. АКШда бул кризис эмнеден улам жаралган? Акчасы батпай кеткен банктар төлөө мүмкүнчүлүгү чектелүү жарандарга деле ипотекалык насыя бере беришкен. Жыйынтыгында алар төлөй албай, көп сандагы үйлөр сатыкка чыгып, кризис жаралган. Ал эми бизде социалдык долбоорлор болууда. Бул жагынан алганда Сингапурдун программасына окшоштурсак болот. Анткени 1970-жылдары Сингапур да калкынын көп катмары үй-жайы жок болгондуктан маселени тез арада чечүү үчүн биздин МИК сыяктуу компания түзгөн. Ага жерди мамлекет берип, саясатын жүргүзүп, курулушту компания аткарган. 10 жыл аралыгында калктын көп бөлүгүн экономкласстагы турак жай менен камсыздалган. Бизде да турак жайга болгон муктаждык курч болгондуктан ушундай жолдо баратабыз. Эми маселе башкада. Курулуш дайыма жүрө берүүчү тармак эмес. Ал бир күнү токтойт. Мына ошондо азыр иштеп жаткан компаниялардын келечеги кандай болот, шаарчаларды куруу үчүн алынган техника эмне болот, канчасын насыя акчага, канчасын өз акчабызга куруп жатабыз, мына ушул маселелер жолго коюлса эле курулуш тармагыбыз кризиске кептелбейт деген ойдомун", — деди Мамытов.
Ал кыргызстандыктарга депозиттин кыймылсыз мүлктөн башка түрлөрүн сунуштоо менен, мисалы, ошол баалуу кагаздар менен бир адамдын көп үйгө ээ болуу теңсиздигин жойсо болорун кошумчалады.
