Уюштуруучулар "Евразия" уюмуна таандык сыйлыктын артыкчылыгын айтып беришти
© Фото / АНО "Евразия"
Жазылуу
БИШКЕК, 24-июл. — Sputnik. "Евразия" бейөкмөт уюмунун эл аралык сыйлыгы эмнеси менен өзгөчөлөнөрүн уюштуруучулар айтып беришти. Алар Sputnik Кыргызстандын маалымат борборунда өткөн брифингде сүйлөштү.
Сыйлыктын байкоочу кеңешинин мүчөсү Алина Молдокеева долбоор ишмердүүлүгү маданий, руханий баалуулуктарды сактоого, элдик дипломатияны өнүктүрүүгө жана постсоветтик өлкөлөрдүн ортосундагы маалыматтык тоскоолдуктарды жоюуга салым кошкон адамдар менен уюмдарды аныктоого жана аларды колдоого багытталганын белгиледи.
Россотрудничествонун Кыргызстандагы өкүлчүлүгүнүн жетекчисинин милдетин аткаруучу Анастасия Брайловская (ортодо)
© Sputnik / Самрат Карачев
"Сыйлык буга чейин жасалган иштерди баалап гана койбостон, жаңы ийгиликтерди жаратууга да түрткү берет деп ишенем. Ал бардык евразиялык мамлекеттерден келген катышуучулардын кеңири чөйрөсү үчүн ачык, постсоветтик мейкиндикке өзгөчө көңүл бурулууда", — деди Россотрудничествонун Кыргызстандагы өкүлчүлүгүнүн жетекчисинин милдетин аткаруучу Анастасия Брайловская.
Russia Today медиатобунун журналисти, сыйлыктын эксперттик кеңешинин мүчөсү Константин Придыбайло калыстар тобун оор иш күтүп турганын белгиледи.
"Биз глобалдык долбоорлор гана эмес, чоң нерсеге айланышы мүмкүн болгон кичинекей, натыйжалуу, жергиликтүү демилгелер да маанилүү экенин жакшы түшүнөбүз. Дал ушундай жаңы идеяларды жана иш жүзүнө ашырууга мүмкүн болгон "берметтерди" биз өзгөчө белгилейбиз", — деди Придыбайло.
Сыйлыктын катышуучусу, "Эл эстейт — Память народа" издөө бирикмесинин жетекчиси Екатерина Дятлова Улуу Ата Мекендик согуш жылдары дайынсыз жоголгон жоокерлердин тагдырын аныктоо долбоору тууралуу айтып берди. Ыктыярчылар жоокерлердин өмүр баянын калыбына келтирүү үчүн Коргоо министрлигинин базалары, "Элдин эсинде" жана "Элдик эрдик" порталдары менен иштешет, курман болгон жерин, сыйлыктарын, туугандарын табышат.
Сыйлыктын катышуучусу, "Эл эстейт — Память народа" издөө бирикмесинин жетекчиси Екатерина Дятлова
© Sputnik / Самрат Карачев
"Документтердин көчүрмөлөрү, саргайган сүрөттөр жана "кара кагаздар" үй-бүлөлөргө жеке тапшырылат. 2025-жылдын башынан бери эле долбоордун алкагында жоокерлердин урпактарынан 250дөн ашык арыз иштелип чыкты. Кыргызстандын беш облусунда кабыл алуу бөлмөлөрү ачылды, мунун аркасында көптөгөн адамдар чоң аталарынын кайда көмүлгөнүн билишти", — деди Дятлова.
Казакстандан келген орус тили мугалими Ольга Акпарова окуучулары менен бирге "Орус тили трендде" долбоорун ишке ашырды. Мында балдар социалдык тармактарда билим берүүчү роликтерди түзүү аркылуу эрежелерди үйрөнүшөт.
"Гаджеттерге тыюу салуунун ордуна, биз аларды окутуу куралына айланттык. Балдар өздөрү видео тартып, монтаждап, татаал темаларды оңой эле эстеп калышат. Биздин #выучимправиловесело хэштеги менен чыккан роликтерибиз миңдеген көрүүлөрдү топтоодо. Балдар сабаттуулугун жогорулатып, санариптик көндүмдөрдү өздөштүрүшөт. Долбоорго жаңы мектептер кошулууда. Негизги максат – окутууну заманбап жана кызыктуу кылуу. Ал эми балдар байгени контенттин сапатын жакшыртуу үчүн профессионалдык камерага жумшагысы келет", — деди Акпарова.
