ЖОЖдорго абитуриенттерди кабыл алуу башталды. График, босого баллы
10:06 14.07.2025 (Жаңыртылды: 10:07 14.07.2025)
© Sputnik / Кристина Кормилицына
/ Жазылуу
БИШКЕК, 14-июл. — Sputnik. Жогорку окуу жайларга абитуриенттерди кабыл алуу башталды. Бул тууралуу Илим, жогорку билим берүү жана инновациялар министрлигинен билдиришти.
Маалыматка ылайык, ЖРТнын жыйынтыгы менен кабыл алуу өнөктүгү беш турду камтыйт.
Кабыл алуу графиги:
биринчи тур — 14-19-июль;
экинчи тур — 21-26-июль;
үчүнчү тур — 28-июль-2-август;
төртүнчү тур — 4-9-август;
бешинчи тур — 11-16-август.
Эгер бош орундар болсо 18, 19 жана 20-августта абитуриенттердин рейтингдик тизмеси боюнча кезектеги талапкерлердин тизмеси жарыяланып, алар кошумча түрдө кабыл алууга сунушталат.
2025/2026-окуу жылы үчүн жогорку окуу жайларга жалпысынан 10 миң билим берүү гранты бөлүнөт.
Кабыл алуу үчүн босого баллдар:
жалпы адистиктер — 110 балл, предметтик тест (англис тили, химия, биология, физика, тарых, математика, кыргыз тили, орус тили) 60 балл;
педагогикалык адистиктер — гранттык квота 130 балл, контракт 115 балл, предметтик тест 60 балл;
саламаттык сактоо адистиктери — гранттык квота 120 балл, контракт 110 балл, предметтик тест (химия, биология, физика) 60 балл;
айыл чарба адистиктери — грант жана контракт 100 балл, предметтик тест 60 балл; аялуу топтор үчүн (I жана II топтогу майыптар, бала кезинен майыптар, тоголок жетимдер жана ата-эненин көзөмөлсүз калган балдар), грант жана контракт 90 балл (медициналык жана фармацевтикалык адистиктерден тышкары).
