Абдышев: ала оорусу тукум кууйт, кишиден кишиге жукпайт
© Sputnik / Арууке Амирдинова
Жазылуу
Дарыгер-дерматолог Темирбек Абдышев ала оорусунун пайда болуу себептери жана андан дарылануу ыкмалары боюнча айтып берди.
Витилиго (ала) оорусу стресстен, иммунитеттин төмөндөшүнөн, ички органдардын ишинин бузулушунан, сапатсыз косметикалык каражаттар менен дары-дармекти ашыра колдонуудан улам пайда болот. Бул тууралуу Темирбек Абдышев Sputnik Кыргызстан радиосунун эфиринде маек куруп жатып билдирди.
Абдышев: ала оорусу тукум кууйт, кишиден кишиге жукпайт
Анын айтымында, ала оорусу тукум кууйт, бирок бир адамдан башка адамга жукпайт.
"Ала оорусуна чалдыкканда денени ак так каптап кетет. Ал буттан өйдө, же тескерисинче, баштан ылдый пайда болушу ыктымал. Аны дененин бул жеринен башталат деп так айтуу кыйын. Жанды кыйнап оорутпаганы менен сырткы келбетти бузат. Стресстен, иммунитеттин төмөндөшүнөн, ички органдардын ишинин бузулушунан, сапатсыз косметикалык каражаттар менен дары-дармекти ашыра колдонуудан улам пайда болушу мүмкүн. Витилиго тукум кууйт, бирок бир адамдан экинчи адамга жукпайт. Аталган дарт менен жабыркагандарга эшикке чыкканда күндүн нурунан коргоочу кремдерди колдонуп, жабык кийинип жүрүүнү сунуштайбыз. Анткени күндүн нуру ала оорусун көбөйтүп же күйгүзүп жибериши ыктымал. Мындан тышкары, туура тамактанууга өтүп, витаминдүү азыктарды көп жеп, спорт менен алектенүү жардам берет. Ала оорусунан сакайып кетүү бейтаптан көз каранды. Эгерде дарыгердин айткандарын так аткарса, оору узаккка созулбайт", — деди Абдышев.
Ал ошондой эле ала илдети адамда жаш куракка карабай пайда болорун жана илдеттин белгилери байкалса дароо дарыгерге кайрылуу зарылдыгын кошумчалады.
