Камаласыңар! Жапаров жетекчилер сентябрдан тарта текшерилерин эскертти
11:37 27.06.2025 (Жаңыртылды: 11:41 27.06.2025)
Жазылуу
БИШКЕК, 27-июн. — Sputnik. Президент Садыр Жапаров бюджеттен берилген акчага "илгеркидей ит адатын карматып" кол салган аткаминерлер чыгып жатканына ачууланган билдирүүсүн социалдык тармактагы баракчасына жазды.
Мамлекет башчы эл аны "мамлекеттик казынадан уурдаба жана уурдатпа" деп шайлаганын, кол алдындагыларды ошондой эле талап менен мамлекеттик кызматка алганын белгилеген.
Жапаровдун кайрылуусунун урунттуу учурлары:
Токмоктогу көрүнүш — акмакчылык. Токмок менен Кара-Балта шаарларына бир миллиард сомдон бөлгөнбүз. Бул акчага аталган шаарларды гүлдөтүп салса болот;
эмдиги жылы дагы бир миллиарддан бөлүп берели деген аруу тилегибиз бар эле. Тилекке каршы, жергиликтүү жетекчилер "подрядчылар" менен бирге коррупцияга барганы көрүнүп турат;
сентябрдан президенттин көзөмөлүндө атайын комиссия түзүлөт. Казынанын акчасына жасалып жаткан иштер, курулуштар, жолдорго канча акча бөлүнгөнү, ага кандай жумуштар аткарылганы, канчасы уурдалганы боюнча катуу текшерүү жүрөт;
кимде-ким уурдаса он эселеп кайтарат жана камалат. Миллион сом уурдап, он эселеп кайтарып, андан сырткары, түрмөгө түшүү кимиңерге керек? Мейли, ким болбогула, эч кимиңерди аябайбыз. Мурдагы заманыңарды унуткула;
эгер мамлекет төлөп берип жаткан эмгек акыга алымсынбай жатсаңар бизнеске кеткиле. Миллиондорду ошол жактан табасыңар.
