Таштанбекова: шылуундарга жеке маалыматтарды адамдар өздөрү таратат
© Sputnik / Арууке Амирдинова
Жазылуу
Жеке маалыматтарды коргоо агенттигинин мыйзамдык экспертиза жана укуктук камсыздоо бөлүмүнүн башкы инспектору Айжамал Таштанбекова жарандар өзүнүн жеке маалыматтарын коргоого жоопкерчилик менен мамиле кылышы керектигин айтты.
Мыйзамга ылайык, жарандардын өмүр баяны жана идентификациялык маалыматтары, жеке мүнөздөмөлөрү, үй-бүлөлүк жана материалдык абалы, ден соолугунун абалы жана банктык реквизиттери жеке маалымат болуп саналат. Алар Жеке маалыматтарды коргоо боюнча мамлекеттик агенттик тарабынан коргоого алынат. Бул тууралуу Айжамал Таштанбекова Sputnik Кыргызстан радиосунун эфиринде маек куруп жатып билдирди.
Таштанбекова: шылуундарга жеке маалыматтарды адамдар өздөрү таратат
Анын айтымында, жеке маалыматтардын сактоочусу маалыматтардын купуялуулугун сактоого милдеттүү.
"Жеке маалыматтарды сактоочу болуп мамлекеттик органдар менен жеке уюмдар саналат. Бирок бүгүнкү күндө шылуундарга маалымат мамлекеттик мекемелерден же уюмдардан эмес, көбүнчө жарандардын өздөрү аркылуу тарап жатат. Айтайын дегеним, интернеттеги оюндар, акциялар, "белек утасың" деген шилтемелер аркылуу жаран өзүнүн аты-жөнүн, жашаган жерин, курагын, кызмат ордун берип жатат. Кийин "менин жеке маалыматымды кайдан алышты" деп таң калышат. Интернет баарын эстейт демекчи, интернет-мейкиндиктеги ар бир кадам узак мөөнөткө сакталып калат. Ошондуктан жарандар жеке маалыматтарын коргоого өздөрү да жоопкерчиликтүү мамиле жасап, алданууга жол бербеши керек. Эгерде жеке маалыматтарыңызга болгон укуктарыңыз бузулса, биринчи кезекте маалымат сактоочуларга кайрылып, укугуңузду талап кылыңыз. Алардан жооп жок болсо, анда Жеке маалыматтарды коргоо боюнча мамлекеттик агенттикке же сотко кайрылууга укугуңуз бар", — деди Таштанбекова.
Ал ошондой эле жеке маалыматтардын купуялуулугу кызматтан кеткенден кийин да сакталарын кошумчалады.
