Путинге Стамбулдагы сүйлөшүүлөр боюнча маалымат берилди. Урунттуу учурлары
22:33 04.06.2025 (Жаңыртылды: 09:16 05.06.2025)
© Sputnik / Вячеслав Прокофьев
/ Жазылуу
БИШКЕК, 4-июн. — Sputnik. Россия президенти Владимир Путин өкмөт мүчөлөрүнүн катышуусундагы жыйында Украина менен сүйлөшүүлөрдө делегацияны жетектеген Владимир Мединскийден Стамбулдагы соңку жолугушуунун жыйынтыгын сурады. Бул тууралуу РИА Новости жазды.
Мединский сүйлөшүүлөр үч саатка созулганын, адегенде тет-а-тет форматында, андан кийин делегациянын бардык курамынын катышуусунда болгонун билдирди. Жолугушууда тараптар орус тилинде сүйлөшүшкөн.
Мединский белгилегендей, Россия тарап элдешүүгө эмес, туруктуу тынчтыкты орнотууну талкуулоого көңүл бурган. Буга Киев жооп кылып Украина тарап Россия сунуштаган меморандумду окуп чыгарын убадалаган.
Мединскийдин мындан башка айткандарынан:
Киев өзүнүн позицияларын тактады – алар ок атышууну 30 күнгө токтотуу убактысын саммитке даярдануу үчүн колдонот;
тараптар туткундагы аскерлерди алмашуу боюнча сандарды макулдашат, бул эки тараптан тең 1200дөн адам болушу мүмкүн;
Россия алмашууну 7-9-июнда баштоого даяр;
ошондой эле Москва жакын арада Киевге украиналык аскерлердин сөөгүн берип, анын ордуна россиялык аскерлердин сөөгүн кабыл алууга даяр;
Мединский Путинге уурдалган балдар деп Украина делегациясы берген тизмени көрсөтүп, бул боюнча иштеп жатышканын белгиледи.
Президент менен өткөн жыйынга РФ тышкы иштер министри Сергей Лавров дагы катышты. Анын билдирүүсүнүн урунттуу учурлары:
Россия менен Украинанын делегацияларынын Стамбулдагы жолугушуусу маанилүү жана пайдалуу болду, сүйлөшүү механизмдери ишке ашууда;
Түркиядагы сүйлөшүүлөрдүн эки айлампасы тең конкреттүү жыйынтыктарды берди;
баарлашуу каналынын болушу дайыма туура, бул гуманитардык маселелердин чечилишине шарт түзөт;
Владимир Зеленский курман болгондордун сөөгү менен жаракат алгандарды топтоо үчүн эки-үч күндүк тыныгуу алуу боюнча Россиянын сунушунан баш тартып ката кетирди;
Киевдин диалогду бузууга багытталган соңку чагымчылыктарына алдырбоо маанилүү.
Өкмөт мүчөлөрү менен өткөн бул жыйында РФ президенти Владмир Путин Украинанын жогорку деңгээлдеги жолугушууну уюштуруу өтүнүчү боюнча оюн айтты. Ал “террористтер менен сүйлөшүүлөрдү ким жүргүзмөк эле?” деген.
Путиндин айткандарынан:
Киевдин легитимсиз режими террористтик уюмга айланууда;
Киев бийлиги фронттогу чоң жоготууларынан кийин Россияны коркутуу аракетин көрүп теракт уюштурууга өттү;
Киевдин демөөрчүлөрү террористтердин шериктери;
бүгүнкү киевдик режимге тынчтыктын кереги жок, аларга бийлик адамдардын өмүрүнөн да маанилүү.
Эске салсак, 2-июнда Түркияда Россия менен Украинанын сүйлөшүүлөрүнүн экинчи раунду өткөн. Жолугушуу Стамбулдагы Чираган сарайында болуп, бир сааттан ашык убакытка созулган. Анда тараптар жаңжалды жөнгө салуу боюнча меморандумдарды алышты.
