Рыскулбекова: вирустук кене энцефалити майыптыкка чейин алып келет
© Sputnik / Арууке Амирдинова
Жазылуу
Бишкек шаарынын Мамлекеттик санитардык-эпидемиологиялык көзөмөлдөө борборунун башкы дарыгеринин орун басары Айнагүл Рыскулбекова вирустук кене энцефалитетинен кантип коргонуу керектигин айтып берди.
Республикада кененин 17 түрү аныкталган жана алардын экөө кооптуу деп эсептелет. Бул тууралуу Айнагүл Рыскулбекова Sputnik Кыргызстан радиосунун эфиринде маек куруп жатып билдирди.
Рыскулбекова: вирустук кене энцефалити майыптыкка чейин алып келет
Анын айтымында, кенеден жабыркаган адамдардын саны улам көбөйүүдө.
"Өлкөдө жылына кене чагуудан жабыркаган миңге жакын адам дарылоо мекемесине кайрылышат. Өтө коркунучтуу курч вирустук кене энцефалити да кенеден жугат. Оору адамга вирусту алып жүргөн кене чаккан маалда шилекей аркылуу жугушу мүмкүн. Кенеге чактыргандан кийин сөзсүз дарыгерге кайрылып, өз убагында дарыланбаса оорунун кесепети ден соолуктун бузулушуна, майыптыкка, керек болсо өлүмгө чейин алып келиши ыктымал. Вирустук кене энцефалитине бардык адамдар, кары-жашына жана жынысына карбай чалдыгат. Ошондуктан тоого, токойго эс алууга чыккан учурда күн кандай гана ысык болбосун, бутка өтүк, жеңи узун кийим кийүү керек. Ошондой эле багалекти байпакка кымтып, моюнду жука жоолук менен ороп кийинген оң. Мындан тышкары, кенелерди качыруучу репелленттерди колдонсо болот. Эс алуудан кайтардан мурда адамдар өзүн жана бири-бирин кылдаттык менен карап чыгуусу кажет. Үйгө келгенден кийин дагы кийимдердин баарын чечип, эс алууга кошо алып барган төшөнчүлөрдүн баарын сыртта кагып, жайып коюу зарыл" , — деди Рыскулбекова.
Ал ошондой эле кенелер март айынан баштап сентябрь айынын аягына чейин активдүү болорун кошумчалады.
