Кайсы жол эрежелерин бузган айдоочулар кайра экзамен тапшырат? Жообу
09:24 20.05.2025 (Жаңыртылды: 09:29 20.05.2025)
© Sputnik / Жантай Макенов
Жазылуу
БИШКЕК, 20-май — Sputnik. ИИМ эреже бузган айдоочуларды кайрадан экзаменге жиберүүнүн тартибин иштеп чыкты.
Коомдук талкууга чыгарылган мыйзам долбоору президенттин тапшырмасын аткаруу үчүн иштелип чыккан. Анда өлкө башчы 1-сентябрдан баштап эреже бузгандардын айдоочулук билимин текшерүүнү табыштаган.
Төмөнкү эреже бузуулар үчүн айдоочунун билимин жеринде текшерүү сунушталууда:
айдоого тыюу салынган, бузук унааны айдоо;
номери жок же аны жашырганга аракет кылгандар;
ыйгарым укуктуу органдын унааны токтотуу талабына баш ийбегендер;
белгиленген ылдамдыктан ашыра айдагандар;
жол чырактын кызыл жарыгында же тескөөчүнүн "тыюу салуучу" белгисинде өтүү, тротуардан же велосипед жолдору менен айдоо, коомдук транспортко артыкчылык бербей коюу, машинаны атайылап "дарылдатып" алуу;
каршы тилкеге чыгып озуу же туура эмес манёвр жасагандар;
автоээнбаштык (унаа жарыштыруу жана башка);
эреже сактабай бирөөнүн мүлкүн же инфраструктурасын (жол, көпүрө ж.б.) бузуу;
эреже бузуп бирөөнүн ден соолугуна зыян келтиргендер;
мас абалында айдоо же мастарга машинаны берүү;
унаанын конструкциясында каралбаган жабдуу, чаптама жана башкаларды уруксаты жок орнотуу;
кооптуу жүктөрдү ташуу эрежелерин бузуу;
жүргүнчүлөрдү ташуу эрежелерин бузуу.
Эгер жеринде текшергенде эрежелерди билбей калса айдоочулук күбөлүгү убактылуу алынып, айдоочу теориялык экзаменге жөнөтүлөт. Аны 60 күн ичинде тапшырбаса айдоо укугу убактылуу токтотулат. Ал эми эреже бузуулар камералар аркылуу катталган болсо, машинаны айдап жүргөн айдоочу өзү экени далилденсе гана экзаменге жөнөтүлөт.
