Муундарды бириктирген документ. Жапаров Конституция күнү менен куттуктады
10:18 05.05.2025 (Жаңыртылды: 10:20 05.05.2025)
Жазылуу
БИШКЕК, 5-май — Sputnik. Баш мыйзам — муундарды бириктирген, тарых менен келечек кыялды чагылдырган документ. Бул тууралуу президент Садыр Жапаровдун 5-май — Конституция күнү менен куттуктоосунда айтылган.
Мамлекет башчы бул адилеттүүлүктү туу туткан элдин келечегине болгон бекем ишенимди эске салган маанилүү күн экенин белгилеген.
“Конституция бул жөн эле беренелердин жыйындысын билдирбестен, ар кыл муунду бириктирген, тамырыбыз менен тарыхыбызды, ошол эле маалда күчтүү, бакубат Кыргызстан тууралуу келечекке болгон кыялыбызды чагылдыруучу негизги документ болуп саналат. Ушул тапта Конституциябыздын деми менен башкарууда, экономикада, жарандарыбызды колдоодо, айтор бардык тармактарда жаңы ыкмаларды киргизүү аркылуу илим-билимге, алдыңкы технологияларга жана тажрыйбага умтулуунун үстүндөбүз. Демек, биз ачык-айкын, тайманбаган туура жана татыктуу жолдо баратабыз”, — деген Жапаров.
Өлкө башчы Баш мыйзам чечим кабыл алууда ар дайым багыт берүүчү алтын казык болуп турушун тилеген.
