Путин Иран менен стратегиялык өнөктөштүк тууралуу мыйзамга кол койду
19:15 21.04.2025 (Жаңыртылды: 12:36 22.04.2025)
© Sputnik / Алексей Никольский
/ Жазылуу
БИШКЕК, 21-апр. — Sputnik. Россиянын президенти Владимир Путин Иран менен ар тараптуу стратегиялык өнөктөштүк келишимин ратификациялоо боюнча мыйзамга кол койду. Бул тууралуу РИА Новости жазды.
Келишимге 2025-жылдын 17-январында Ирандын президенти Масуд Пезешкяндын Москвага жасаган иш сапарынын алкагында кол коюлган.
Макулдашуунун негизги жоболору:
Москва менен Тегеран эки тарапты кызыктырган бардык чөйрөлөрдө соода-экономикалык кызматташтыкты колдоого макулдашты;
тараптар биргелешкен аскердик машыгууларды өткөрүүдө тыгыз кызматташат;
эгерде мамлекеттердин бири агрессияга дуушар болсо, экинчиси кол салуучу тарапка чабуулду улантууну жеңилдете турган жардамды бербеши керек;
Россия менен Иран өз аймактарын алардын аймактык бүтүндүгүнө коркунуч келтирген сепаратисттик кыймылдарды колдоо үчүн пайдаланууга уруксат бербейт;
Москва менен Тегеран эл аралык терроризмге жана башка чакырыктар менен коркунучтарга каршы күрөштө кызматташат;
өлкөлөр бир тараптуу мажбурлоо чараларын колдонууга каршы чыгууга ниеттенип, аларды киргизүүнү эл аралык укукка каршы акт деп эсептешет;
Москва менен Тегеран бири-бирине каршы санкциялар боюнча үчүнчү өлкөлөргө кошулуудан карманышат жана бир тараптуу мажбурлоо чараларын колдонбоого кепилдик беришет;
жалган маалыматка жана терс пропагандага каршы туруу боюнча эки өлкөнүн ЖМКларынын ортосундагы кызматташтыкты өнүктүрүү;
Москва менен Тегеран табигый жана техногендик кырсыктарды алдын алууда бири-бирине мүмкүн болгон жардамдарды көрсөтөт;
Россиядан Иранга кеткен газ кууру Азербайжан аркылуу өтөт, тараптар бааны макулдашууда;
үчүнчү өлкөлөрдөн көз карандысыз болгон төлөм инфраструктурасын түзүү жаатында кызматташуу;
Россия менен Иран тынчтык максаттагы өзөктүк энергетика тармагындагы биргелешкен долбоорлорго, анын ичинде атомдук энергетикалык объектилерди курууга кызыкдар;
келишим 20 жылга түзүлөт жана кийинки беш жылдык мөөнөткө автоматтык түрдө узартылат.
Бул документ 2001-жылы кол коюлган Россия менен Ирандын ортосундагы мамилелердин негиздери жана кызматташуу принциптери жөнүндөгү учурдагы келишимди алмаштырууга багытталган. Жаңы келишим боюнча, иш 2022-жылдан бери жүрүп жатат. Өткөн жылдын июнь айында тараптар анын текстин макулдашканы белгилүү болгон. Кремль мурда белгилегендей, бул документ эки тараптуу мамилелердин жаңы деңгээлге чыкканын чагылдырат.
