Гепатиттин В, С түрү менен ооругандардын саны 27 миңден ашты

"Республикалык кан аркылуу жугуучу вирустук гепатитти жана адамдын иммундук жетишсиздик вирусун көзөмөлдөө борбору 2022-жылдын аягында түзүлгөн. Ага чейин СПИД борбору деп эле аталган. Борбор ВИЧ инфекциясын көзөмөлдөө, дарылоо, профилактика иштери менен алектенген. Кийин функциясы өзгөрдү. Негизи кан аркылуу жугуучу вирустук гепатитти көзөмөлдөгөн бир дагы орган болгон эмес. Гепатиттин В, С түрү менен ооругандардын саны 5 миң деп белгиленип, ошого жараша дарылар алынган. Бирок февраль айындагы маалымат боюнча, 27 312ни түздү. Анын ичинен гепатиттин В түрүн жугузуп алгандардын саны 16 448 болуп, анын 4850сү дарыланып жатат. Алардын арасынан 2 463 бейтап гепатиттин бириктирилген В-D түрү менен ооруйт. Ал эми гепатиттин С түрүнө чалдыккандардын саны — 8401. Мындан ары мониторинг иштери күчөтүлүп, такталган маалыматтар берилет", — деди Жумабеков.