Маматов: быйыл түштүк аймакта беш көмүр кени ачылат
© Sputnik / Арууке Амирдинова
Жазылуу
"Кыргыз көмүр" мамлекеттик ишканасынын башкы директору Кайрат Маматов жыл ичинде беш жаңы кенди ачуу мерчемделип, учурда даярдыктар жүрүп жатканын айтты.
Өкмөт тарабынан калкты арзан жана сапаттуу көмүр менен камсыздоо тапшырмасы берилген. Анын алкагында быйыл беш жаңы кен ачууга даярдык көрүп жатабыз. Бул тууралуу Кайрат Маматов Sputnik Кыргызстан радиосунун эфиринде маек куруп жатып билдирди.
Маматов: быйыл түштүк аймакта беш көмүр кени ачылат
Анын айтымында, былтыр республиканын түштүк аймагында жайгашкан Загара-2 жана Урмизан-3 кендери иштетүүгө киргизилген.
"Эң чоң кендердин бири Сүлүктү талаа-11 Баткенде жайгашкан. Жүргүзүлгөн изилдөөлөргө ылайык, ал жерде көмүрдүн 100 миллион тоннага жакын запасы бар. Ош облусунда Кожо-Келең жана Беш-Буркан, ал эми Жалал-Абадда Маркай менен Теген кендери жайгашкан. Учурда жаңы техникалык долбоорлор түзүлүп, коопсуздугу изилденип жатат. Белгилей кетчү жагдай, бул кендерди ушул жылы ачууну пландап жатабыз, бирок дароо көмүр казып баштабайбыз. Анткени техникалык долбоорлорду ишке ашыруу керек. Мөнөөтү алты айдан сегиз айга чейин созулат. Мындан тышкары, бардык экспертизалардан өтүү кажет. Башкача айтканда, бир кенди ачып, аны иштетүү үчүн жок эле дегенде эки жыл убакыт талап кылынат экен. Былтыр Кара-Суу районунда Загара-2 кени ачылган. Ал жерден 2024-2025-жылытуу мезгилинде 6 000ден ашык тонна көмүр казып алынды. Ал эми Урмизан-3 кени ачылганы менен айрым себептерден улам көмүр казыла элек", — деди Маматов.
Ал ошондой эле көмүр казууда чыгым көп болгондуктан кен иштетүү боюнча ички жана тышкы инвесторлор менен келишим түзүлгөнүн кошумчалады.
