Министрлик кургак учук менен күрөшүүдөгү негизги көйгөйлөрдү атады
13:50 24.03.2025 (Жаңыртылды: 14:53 24.03.2025)
© Sputnik / Константин Михальчевский
/ Жазылуу
БИШКЕК, 24-мар. — Sputnik. Саламаттык сактоо министрлиги кургак учук менен күрөшүүдөгү негизги көйгөйлөрдү атады.
Sputnik Кыргызстан агенттигинин маалымат борборунда "Кургак учук менен күрөшүү — ийгиликтер жана кыйынчылыктар" аттуу жыйын өттү. Ага Саламаттык сактоо министрлигинин өкүлү катыша албаганы менен ведомство маалыматтарды берген.
Ага ылайык, төмөнкү жагдайлар көйгөй катары аталды:
калктын маалымдуулугунун төмөндүгү. Көпчүлүк сунуштарды аткарбай, медициналык жардамга кеч кайрылышы оорунун жайылышына алып келет;
жалпы профилдеги медицина кызматкерлеринин маалыматынын жетишсиздиги илдеттин кеч аныкталышына себеп болууда;
диний себептерден улам эмдөөдөн баш тартуу. Бул кургак учуктун оор формаларынын пайда болушуна алып келет, аларды дарылоо татаалыраак жана чыгымы көп болот;
оорулууларга карата жогорку стигматизация жана коомдон, атүгүл медицина кызматкерлери тарабынан дискриминация сакталууда;
медициналык кызматкерлердин жетишсиздигинен улам оорулуулар менен байланышта болгондор кеч аныкталат;
фтизиатр адистеринин жетишсиздиги. Кургак учуктун жугуу ыктымалдыгы жогору болгондуктан ординаторлор жана жаш адистер бул тармакта иштөөдөн качышат. Аймактарда негизинен пенсионер жана пенсияга чейинки курактагы адистер иштейт;
мигранттар — кургак учук боюнча негизги топтордун бири. Алардын оору тууралуу маалыматы аз, дарыгерлерге кеч кайрылышат, бул илдеттин башкаларга жугушуна себеп болууда.
