Козуев: 12 жылдык окууга 1-2-класстар толук өтөт, айрым предметтер даяр
© Фото / Арууке Амирдинова
Жазылуу
Билим берүү министрлигинин мектеп, мектептен тышкары кошумча билим берүү башкармалыгынын башчысы Бакыт Козуев 12 жылдык билим берүү тутумуна даярдыктар тууралуу айтты.
Учурда 12 жылдык билим берүү жаатында мамлекеттик стандарт кабыл алынды. Эми предметтик стандарттарды кабыл алуу боюнча иш жүрүүдө. Бул тууралуу Бакыт Козуев Sputnik Кыргызстан радиосунун эфиринде маек куруп жатып билдирди.
Козуев: 12 жылдык окууга 1-2-класстар толук өтөт, айрым предметтер даяр
Козуев: 12 жылдык окууга 1-2-класстар толук өтөт, айрым предметтер даяр
Анын айтымында, учурда окумуштуулар, Билим берүү академиясы окуу программаларын даярдоонун үстүндө иштеп жатышат.
"Жылына 1-класска 120-130 миңдин тегерегинде бала кабыл алынчу. Ал эми биздин эсептөөбүз боюнча, быйыл 200 миңге жакын бала келет. Туура, калк жыш жайгашкан Бишкек жана Ош шаарларында окуучуларды мектепке толук батыруу жаатында маселе бар. Учурда шаардык өз алдынча башкаруу органдары билим берүү мекемелери менен бул багытта абдан тыгыз иштеп жатышат. Ал эми министрлик жалпы республикадагы нөлүнчү класста жана бала бакчада "Наристе" программасынын алкагында мектепке даярдык көрүп жаткан балдардын санын эсептеп чыгарып көрдүк. Негизи мектептик программалар үч баскычтан турат. Биринчиси башталгыч, негизги жана жалпы баскыч болуп бөлүнөт. 1-2-класска кабыл алынган окуучулар 12 жылдыкка өткөн жаңы программа менен билим алышат. Алты жаштагы балдарга ылайыкталган программа боюнча, 1-класста оюн тибиндеги таанып-билүү сабактары көп болот. Буга социалдаштыруу, коомдо өзүн алып жүрүү, тазалык, адептүүлүккө, мамиле курууга үйрөтүү камтылган. Ал эми негизги мектептеги 2-баскычта илим сабагы киргизилет", — деди Козуев.
Ал бардыгы эле класстан класска секире бербей турганын жана бул маселе такталып жатканын билдирди.
"Совет мезгилиндеги билим берүү тутумун жаман дей албайбыз, бирок дүйнө өнүгүп жаткандыктан 12 жылдык окутууда предмет аралык байланыштар абдан көп болот. Класстан класска секиртип окутуу жагы азыр такталууда. Мамлекеттик саясаттын көз карашында да өзгөрүүлөр болуп жатат. Бирок өнүккөн мамлекеттердин тажырыйбасында, Кембридж программасынын негизинде түзүлгөн жаңы китептердин линейкасы бар. Анын бири 3-9-класска чейин балдарга англис тилин үйрөтүүгө мыкты усулдар менен даярдалган окуу программасы келе жатат. Илим сабагынын программалары түзүлүүдө. Эми жылдан-жылга предметтик сабактардын окуу китептеринин чыгарылышы, окуу программаларынын даярдоо процесси этап-этабы менен белгиленген иштин негизинде жүргүзүлөт", — деди Козуев.
Ал СТЕМ багытындагы тренерлер да жер-жерлерге барып, сабакка жолтоо болбой мугалимдерди окутуп жатканын кошумчалады.
