Тынчтыкка даяр эмес. Кремль Зеленскийдин Ак үйдөгү жоругуна баа берди
© Sputnik / Наталья Селиверстова
Жазылуу
БИШКЕК, 3-мар. — Sputnik. Россия президентинин маалымат катчысы Дмитрий Песков Владимир Зеленскийдин Ак үйдө АКШ лидери Дональд Трамптан коопсуздук кепилдигин талап кылып кайым айтышканы боюнча комментарий берди. Кремль өкүлүнүн билдирүүсүнүн урунттуу учурлары төмөнкүдөй болду.
Зеленскийдин жүрүм-туруму тууралуу
Зеленскийдин Ак үйдөгү билдирүүлөрү Москванын абалды жөнгө салуу ниети Киевдин кежирлигине такалып жатат деген Путиндин сөзүнүн тууралыгын далилдеди;
Зеленский дипломатиялык жөндөмү жок экенин көрсөттү, андан аркысы тууралуу кеп кылуунун кереги жок;
Трамп менен Зеленскийдин жолугушуусу Украина абалын жөнгө салуу канчалык кыйын болорун көрсөттү;
Зеленскийдин аймактарынан баш тартууга даяр эместиги анын учурдагы реалдуулукту кабыл алууга каалоосу жок экенин ачыктады.
"Кимдир бирөө Зеленскийди позициясынан кайттырышы керек. Ал тынчтыкты каалаган жок, бирөө каалаттырышы керек. Колунан келсе европалыктар жасасын", — деди Песков.
Украина боюнча абалды жөнгө салуу
бүгүнкү күндө Украинадагы кырдаалды жөнгө салууга багытталган конструктивдүү сунуштун бардык түрү зарыл болуп турат;
божомолдор бар, бирок так план азырынча түзүлө элек;
жамааттык Батыш жамааттыгынан ажырап бара жатат, эки жээк байкалууда: Украинада согуштун улануусун каалаган тарап бар;
Европанын каржылык колдоону көбөйтүшү тынчтык планы үчүн эмес, согуштук аракеттерди улантуу үчүн керек.
"Калганы кандай план түзүлүп, кайсынысы талкууга чыгарыларынан көз каранды болот", — деди Песков.
АКШ менен сүйлөшүү жана атайын операциянын уланышы
Россия АКШ менен мамилени жолго коюу боюнча диалогду улантууда;
Путин менен Трамптын ортосунда көпчүлүктү кабардар кыла турчу сүйлөшүү боло элек;
Россия өз максатына жетүү үчүн атайын аскердик операциясын улантууда;
Стамбул макулдашуулары түзүлгөндөн бери кырдаал өзгөрдү, муну көзү сокур киши эле көрбөй калышы мүмкүн.
Ак үйдөгү кайым айтышуу
Зеленский 28-февраль күнү сейрек кездешүүчү металлдар боюнча макулдашууга кол коюу үчүн Вашингтонго барган. Бирок ага чейин эле Трамп жана вице-президент Жей Ди Вэнс менен кайым айтыша кеткен. АКШ президенти Зеленскийден ок атууну жана РФ лидери Владимир Путинди сындоону токтотууну талап кылган. Киев режиминин жетекчиси актанып, Россияны күнөөлөп, жаңжалдын кесепетин тартат деп АКШны коркута баштаганда, Вэнс аны "нысапсыз үгүтчү" деп атаган.
Бул окуядан кийин келишимге кол коюлбай, Зеленский сапарын жыйынтыктоого мажбур болгон.
