Мамытов: ЕАЭБдин баалуу кагаздар рыногун колго алуусу — жакшы нерсе
© Sputnik / Арууке Амирдинова
Жазылуу
Мамлекеттик башкаруу академиясынын жаңы экономика боюнча илим-изилдөө кафедрасынын жетекчиси, экономист Улукман Мамытов баалуу кагаздар рыногунун келечегине сереп салды.
Тарыхта баалуу кагаздар рыногу мамлекеттин экономикасын өнүктүрүп кеткен учурлар көп. Ошол эле Наполеондун Англияга утулуп калышынын бирден-бир себеби да ушул баалуу кагаздар болгон. Мындай пикирин Улукман Мамытов Sputnik Кыргызстан радиосуна маек куруп жатып белгиледи.
Анын айтымында, Евразиялык экономикалык биримдиктин бул тармакка олуттуу көңүл бура башташы уюм үчүн ийгиликтүү долбоорлордун бири болот.
"Баалуу кагаздар рыногу — экономика үчүн өтө кызыктуу жана келечектүү тармактын бири. Тарыхты карасак да айрым мамлекеттерде анын орду чоң экенин көрөбүз. Ал эми Кыргызстанга келе турган болсок, биржаны өнүктүрүп, элди баалуу кагаздын активдүү колдонуучусуна айлантуу мүмкүнчүлүгү кенен. Анткени кыргыздар жаңы нерсени бат үйрөнүп, жаңыга кызыгуусу күч калк келет. Мындай коомдо баалуу кагаздар жакшы өнүгөт. Бирок, тилекке каршы, учурда маалымат жетишсиз, өкмөттүн да бул жаатта алгылыктуу механизмдери жокко эсе. Ал эми ЕАЭБ алкагында алып карай турган болсок, биримдиктин бирдиктүү рынок түзүүгө киришкени жакшы көрүнүш. Жогоруда айткандай, бул — колго алына турган жана эки тарапка тең киреше алып келе турган тармак. Бирок ошол ЕАЭБдин ичинде, мисалы, Россиянын же Казакстандын биржасына биздики тең келе албайт. Андыктан кайсы өлкөдө баалуу кагаз рыногу өнүккөн болсо, биримдик ичинде аянтчаны ошол мамлекеттердин компаниялары ээлеп алышы мүмкүн. Мындай учурда, мисалы, Кыргызстанды ала турган болсок, элдин киреше табуу мүмкүнчүлүгү жогорулайт, ал эми өкмөт мындан эч кандай киреше көрө албай калышы ыктымал. Демек, биз да биржабызды өнүктүрүшүбүз зарыл", — деди Мамытов.
Ал жөнөкөй калкка түшүнүктүү жана жеткиликтүү болгон турктуу механизмдерди иштеп чыгуу керектигин кошумчалады.
