Ташиев коррупцияга каршы күрөштүн күч алган этабы 4-5 жылга созуларын айтты
10:29 17.01.2025 (Жаңыртылды: 10:30 17.01.2025)
© Фото / Откурбек Рахманов
Жазылуу
БИШКЕК, 17-янв. — Sputnik. Төрт-беш жылдан кийин коом өзү коррупцияга жол бербей калат. Бул тууралуу УКМК төрагасы Камчыбек Ташиев билим берүү системасынын кызматкерлери менен жолукканда билдирди.
Анын айтымында, күрөш тармак-тармак боюнча жүрүп жатат.
"Коррупция менен күрөш убактылуу, бир-эки жылдан кийин токтоп калат деп ойлобогула. Азыр чекесинен ордуна коюп келе жатабыз. Билим берүү тармагындагы коррупциялык схемаларды жокко чыгарып, студенттердин таза окуусун камсыздап, ушинтип төрт-беш жыл катуу кармап турсак, андан кийин коом өзү көнүп калат. Андан кийин бизсиз эле эч ким коррупцияга жол бербей калат. Студенттер, мугалимдер дагы билип, эч ким коррупциялык иштер менен алектенбей калат. Башкача айтканда, биз түбөлүк кармап турбайбыз. Мобул муштумда эки-үч, балким, беш жыл катуу кармаарбыз", — деди Ташиев.
Ошондой эле ал өлкөдө мамлекеттик система иштебей калганын, аны калыбына келтирүүгө аракеттер көрүлүп жатканын белгилеп, ал тургай УКМК дагы коррупциядан толук арыла электигин айтты. Төраганын айтымында, былтыр жети кызматкер кылмыш жазасына тартылып, 20дай адам иштен айдалган.
