Абакиров: ишкерлерге эле эмес, ипотекага үй, унаа алчуларга да көмөктөшүү каралууда

"Жылына эки жолу аймактарды кыдырып ишмердигибиз тууралуу маалымат беребиз. Банк насыя алуучунун документтеринин пакетин интернет аркылуу бизге жиберет. Аны кабыл алып, карайбыз. Кээде бизнес-планынын божомолу дал келбей, туура эмес саналып же насыялык-маалыматтык бюродо карыздары бар, айрымдарга чет мамлекетке кетпөө чектөөсү коюлган же белгилүү саясий адам болуп калат. Ушундай учурларда баш тартабыз. Негизинен баарын баалап, комплекстүү чечим кабыл алынат. "Кепилдик фонддун" мыйзамы боюнча, ишкерлерге гана жардам бере алабыз. Бирок карап көрсөк, азыр ипотекага үй алууда банктар 30 пайызга чейин баштапкы каражатын төлөөнү талап кылууда. Ошондуктан 2022-жылы мыйзамга өзгөртүүлөр кирген, ага ылайык, ипотекага үй алып жаткан адамдарга да кепилдик берилет. Учурда 147 адам алды. Мамлекет ипотекалык компанияларга көп каражат жумшоодо. Быйыл 5000ге жакын жаран батир алат. Биз да кепилдик берүүгө даярбыз. Муну менен катар автоунаа кураган бир катар заводдор ишке кирип жатат. Азыр ипотекага автокөлүк алууга мыйзамдар мүмкүнчүлүк бербейт. Кайрылган жарандар да болуп жатат. Ошол себептен акционерибизге түшүндүрүп, Жогорку Кеңешке мыйзамды өзгөртүү сунушун бергенбиз. Биринчи окуудан өттү. Декабрдын аягына чейин 2-3-окуудан өтүп калса жеке адамдарга да автоунаа үчүн кепилдик берилет. Учурда ишкерлерге берилип жаткан кепилдиктин көлөмүнө 2-2,5 пайыз комиссия алабыз", — деди Абакиров.