Айныкеева: республикада госпиталдык мектепке расмий статус бериле элек
© Sputnik / Арууке Амирдинова
Жазылуу
"Жардам берүү оңой" фондунун пиар кызматкери Мээрим Айныкеева Бишкекте госпиталдык мектептердин абалын жакшыртуу боюнча алгачкы форум болуп өткөнүн айтып берди.
Өлкөдө госпиталдык мектеп биринчи жолу 2018-жылы Бишкектеги Улуттук онкология жана гематология борборунда ачылган. Бул тууралуу Мээрим Айныкеева Sputnik Кыргызстан радиосунун эфиринде маек куруп жатып билдирди.
Айныкеева: республикада госпиталдык мектепке расмий статус бериле элек
Ал азыркы учурда госпиталдык мектепке мамлекет тарабынан расмий статус бериле электигин белгиледи.
"2018-жылы Москвадагы Дмитрий Рогачев атындагы Балдардын улуттук медициналык онкология, гематология жана иммунология борборунун "УчимЗнаем" долбоору менен Кыргызстандагы Билим берүү жана илим министрлигинин ортосунда меморандум түзүлүп, алгачкы жолу өлкөдө дагы госпиталдык мектеп ачылган. Мунун аркасы менен "Жардам берүү оңой" фонду Оштогу балдардын онкология ооруканасына дагы госпиталдык мектеп ачкан. Мындай мектептерди көбөйтсөк жакшы болмок. Оштогу госпиталдык оорукананын мугалимдерине мамлекет тараптан айлык акы каралган эмес. Мугалимдердин эмгек акысы, балдардын окуу куралдары фонд жана ыктыярчылар, демөөрчүлөр тарабынан камсыздалып турат. Ал эми Бишкектеги госпиталдык мектеп мамлекет тарабынан каржыланат. Азыркы тапта госпиталдык мектепке мамлекет тараптан расмий статус бериле элек жана укуктук-нормативдик актылар иштелип чыга элек. Бул маселе 13-декабрь күнү баш калаада өткөн "Билим берүү жана камкордук: Кыргызстандагы госпиталдык педагогика" аталышындагы форумда көтөрүлдү. Иш-чарага Россия жана КМШ өлкөлөрүндө госпиталдык мектептердин негиздөөчүсү, "УчимЗнаем" долбоорунун ээси Сергей Шариков катышып, өзүнүн тажрыйбасы менен бөлүштү. Форумдун алкагында билим берүү жана илим министринин орун басары Лира Самыкбаева менен Сергей Шариков жана балдар укугун коргоочу, госпиталдык мектептин мугалими менен жолугушуу болду. Анда Оштогу госпиталдык мектептин мугалимдерине мамлекет тарабынан айлык акы берүү, балдарды окуу куралдары менен камсыздоо, санариптик мүмкүнчүлуктөрдү кеңейтүү сыяктуу көйгөйлөр айтылды. Ошондой эле мугалимдердин квалификациясын жогорулатуу максатында Москвага окууга жөнөтүү да талкууланды", — деди Айныкеева.
Ал аталган форумдун жыйынтыгында айтылган көйгөйлөрдүн үстүнөн иштөө боюнча резолюция кабыл алынганын кошумчалады.
Маалымат үчүн: "Жардам берүү оңой" фонду он жылдан бери рак менен ооруган балдарга ар тараптуу жардам көрсөтүп келет. Фонддун негизги максаты — онкологиялык оорулар менен жабыркаган балдардын дарылануусуна жана реабилитациясына татыктуу шарт түзүү.
